Hökumətyönlü deputatlar növbədənkənar prezident seçkiləri barədə

Bakı/05.02.18/Turan: "Bu, Konstitusiyadan irəli gələn, həm də dövlət başçısının səlahiyyətinə aid olan məsələdir", - hakim Yeni Azərbaycan Partiyasından deputat Aydın Mirzəzadə növbədənkənar prezident seçkilərinin keçirilməsi ilə bağlı qərarı Turan-a şərh edərkən bildirib.

A.Mirzəzadə vurğulayıb ki, bu il bir neçə mühüm tədbir var və bunların hamısını yüksək səviyyədə qeyd etmək lazımdır. "Bu il həm Cümhuriyyət, həm də ordunun yaradılmasının bir əsrlik yubileyidirr və bü tədbirlər dövlətçilik tarixilə bağlıdır. Azərbaycan da oturuşmuş dövlət olaraq bu tədbirləri dünyaya ən yaxşı şəkildə təqdim etməlidir, bu isə hazırlıq tələb edir", - o bildirib.

Bitərəf deputat Zahid Orucun fikrincə, növbədənkənar prezident seçkiləri dünya təcrübəsində də var, odur ki, burada hər hansı fövqəladə durum yoxdur.

2016-cı ildə Konstitusiyaya dəyişkliklərlə bağlı prezidentlik müddətinin 7 ilədək artırılması bəyənilib, odur ki, bu qərar daha çox Konstitusiya tələbi kimi ortaya çıxır.

Z.Oruc seçkilərin irəli çəkilməsi ilə müxalifət qüvvələrinin seytnot vəziyyətinə salınması barədə fikirlə razı deyil: "Guya seçkilər indi yox, oktyabrda keçirilsə idi, müxalifət buna xüsusi hazırlıq görəcəkdi ki? Arxasında miylonlarla seçici yox, 100 milyonlarla vəsait yox. Odur ki, müxalifətin seçkidə məğlubiyyətinin səbəbi başqadır, seçki hazırlığında deyil".-05D06--