HRHF Azərbaycan hakimiyyətini insan hüquqlarının pozulmasına son qoymağa çağırıb

Bakı/16.06.20/Turan: İnsan Haqları Evi Fondu və İnsan Haqları Evləri Şəbəkəsi ölkədə COVİD-19 başlayandan bəri Azərbaycan hakimiyyətinin dinc aksiyalara, habelə müstəqil və müxalif səslərə güclənən hücumları ilə bağlı narahatlığını ifadə edib.

"Biz Azərbaycan hakimiyyətinı insan haqları pozuntularını dərhal dayandırmağa və beynəlxalq birliyi hökuməti cavabdeh tutmağa çağırırıq", deyə müraciətdə bildirilir.

Sənəddə qeyd edilir ki, ifadə və sərbəst toplaşmaq azadlığı əsasdır və Azərbaycanın beynəlxalq hüquq qarşısında öhdəlikləri var. Bununla yanaşı, hakimiyyət pandemiyadan istifadə edərək, pandemiyaya məhəl qoymayan və infeksiyanın artımasını şübhə altına alan hər kəsə qarşı daha bir sərt basqı həyata keçirir. Azərbaycan hökuməti bu cür addımları dərhal dayandırmalı, qanunsuz olaraq həbs olunanları azad etməli və toplaşmaq və ifadə azadlıqlarının qorunması kimi insan haqlarına dair öhdəliklərinə əməl etməlidir.

Son günlər polis çox sayda özbaşına həbslər həyata keçirib, dinc nümayişçiləri, o cümlədən təkbaşına etiraz edənləri ölçüsüz təqibə məruz qoyub. Azərbaycan hakimiyyəti 2020-ci il martın 24-dən xüsusi karantin rejimi tətbiq edir, bunun üçün fövqəladə vəziyyət elan etməklə hüquqi əsas müəyyən etmir. 2020-ci il mayın 31-də polis tələbələrin etiraz aksiyasını dağıdıb, onları bir gündən 15 günədək azadlıqdan məhrumetmə cəzasına məhkum edib. Digər iki hadisədə polis məşhur qraffiti fəalı Qiyas İbrahimovun damda təkbaşına etiraz aksiyasının və tələbələrin etiraz aksiyasının dağıdılmasına etiraz edən hüquq müdafiəçisi Gülnarə Mehdiyevanın aksiyasının qarşısını alıb. Sonradan Qiyas kiçik xuliqanlıqda ittiham edilib və cərimə olunub, Gülnarə isə polis bölməsindən sərbəst buraxılıb.

Bu yaxınlarda Bakının Yeni Yasamal rayonunda da zorakı həbslər baş verib, sakinlər söz hücumuna məruz qalıb və mənzillərindən zorla çıxarılaraq aparılıb.

Azərbaycan Vəkillər Assosiasiyasının hakimiyyətin icra orqanı qismində çıxış etməsinin bir nümunəsi vəkil Cavad Süleymanlının müştərisinə qarşı davranışla bağlı qanuni narahatlığını dilə gətirdiyinə görə Vəkillər Assosiasiyasından xəbərdarlıq almasıdır.

Bundan başqa, siyasi müxalifətə hücumlar çoxalıb. Bu hücumlar prezident Əliyevin 19 may 2020-ci il tarixli bəyanatında pandemiyaya reaksiya tədbirlərindən müxalifətin boğulması və birləşmək azadlığının məhdudlaşdırılması üçün istifadə etmək niyyətini dilə gətirməsinin ardınca baş verib.

Apreldə Human Rights Watch Azərbaycan hakimiyyətini "koronavirusun yayılmasının gecikdirilməsi üçün tətbiq edilmiş məhdudiyyətlərdən hökuməti tənqid edənlərin həbsi məqsədilə sui-istifadə etməkdə" ittiham edib. Həmin vaxtdan vətəndaş cəmiyyəti qrupları müxalifət partiyasının üzvlərinin həbsi, habelə Xalq Cəbhəsi Partiyasının lideri Əli Kərimlinin İnternet və telefon əlaqələrinin uzun müddət kəsilməsi ilə bağlı narahatlıqlarını ifadə ediblər. Dövlət hakimiyyətindən müxalifət qüvvələrini susdurmaq və toplaşmaq azadlığını məhdudlaşdırmaq üçün bu cür istifadəhakimiyyətin beynəlxalq hüquq qarşısında öhdəliklərini yerinə yetirmək istəməməsinin daha bir nümunəsidir.

İnsan Haqları Evləri şəbəkəsi koronavirusla bağlı yoluxma və ölüm saylarını azaltmaq üçün həyata keçirilən tədbirləri dəstəkləyir. Lakin dövlət orqanları bu tədbirləri görərkən insan haqları pozuntularına yol verməməlidirlər. İfadə, birləşmək və toplaşmaq azadlığı plüralist, demokratik və azad cəmiyyətdə əsas hüquqlardır. Azərbaycan hakmiyyəti ayrı-ayrı şəxslərin və siyasi müxalifətin istifadə etdiyi bu hüquqları pozmağa davam edir və bunun üçün ictimai sağlamlığın müdafiəsindən istifadə edir. Biz hakimiyyəti bu insan hüquqları pozuntularına dərhal son qoymağa çağırırıq. Beynəlxalq ictimaiyyət isə hakimiyyəti məsuliyyətə cəlb etməlidir, deyə müraciətdə bildirilir. -0-