Kullarda gecə baş vermiş qarşıdurma zamanı onlarla azərbaycanlı saxlanılıb (yenilənib)

Bakı/16.06.20/Turan: Dağıstanın Kullar qəsəbəsində Azərbaycan vətəndaşları və rus polisi arasında gecə baş vermiş qarşıdurma zamanı 50-yə yaxın Azərbaycanlı bədən xəsarətləri alıb, 100-120 nəfər saxlanılıb. Bu barədə Turan-a Kullarda çadır düşərgəsində olan Azərbaycanlılardan biri bildirib.

Artıq məlumat verildiyi kimi, Azərbaycanlılar sərhədə doğru yürüş etməyə cəhd ediblər, amma saxlanılıblar.

"Burada insanlar ay yarım - iki aydır vətənə buraxılmağı gözləyirlər. Dünən növbəti qayıdacaqlar siyahısına düşmüş şəxslərin siyahısı elan edilib. Amma siyahıya sərhəddəki insanların yarısından azının ad düşüb. Çoxları buraya yeni gələnlərin adları siyahıya düşdüyü üçün qəzəblənib. Axşam saatlarında hamı aksiyaya çıxıb və insanların bir hissəsi sərhədə tərəf irəliləyib. Polis etirazçıların yolunu kəsib və onları saxlamağa cəhd edib. Amma insanlar ümidsizcə saxlanılan şəxsləri polisin əlindən almağa çalışıblar. Sonra polis gözyaşardıcı qazdan istifadə edib, buna cavab olaraq insanlar əllərinə keçəni onlara atmağa başlayıb. Dəstək üçün gələn Rusiya Qvardiyasının hərbiçiləri etirazçıların öhdəsindən gələ bilməyib. Bundan sonra havaya atəş açmağa və insanları dəyənəklə döyməyə başlayıblar", deyə mənbə bildirib.

Səhər saatlarında ərazi təmizlənib, insanların qanı yuyulub.

Bu gün 200 nəfərlik növbəti partiya Azərbaycana qaytarılıb. Çoxdan düşərgədə qalanlar yenə bu partiyaya düşə bilməyiblər.

Bu gün Azərbaycan dövlət orqanlarının nümayəndələrinin gələcəyi gözlənilir. -03B06-

*   *   *

2020 İyun 16 (Çərşənbə axşamı) 13:08:34

Polis Dağıstanda Azərbaycan vətəndaşlarının etiraz aksiyasını qəddarcasına  dağıdıb (YENİLƏNİB)

Bakı /16.06.20/ Turan: Polis gözyaşardıcı qaz və dəyənəklərdən  istifadə edərək Azərbaycan vətəndaşlarının Kullardakı etiraz aksiyasını qəddaecasına  dağıdıb.

Bir çox etirazçı müxtəlif dərəcəli xəsarətlər alıb. Saxlanılanlar var.

“Azərbaycan dövləti haradadır, vətəndaşlarını niyə belə vəziyyətə gətirir və belə davranışa məruz qoyur. Bizi bu çöldə  taleyin ixtiyarına buraxıblar”, deyə  etirazçılardan biri deyib. - 06B-

*   *   *

2020 İyun 16 (Çərşənbə axşamı) 00:41:20

Dağıstanın Qullar qəsəbəsində Azərbaycan vətəndaşlarının etiraz aksiyası

Bakı/15.06.20/Turan: Vətənə qayıtmasını gözləyən Azərbaycan vətəndaşları iyunun 15-də axşam Dağıstanın Qullar qəsəbəsində sərhəddə buraxılmaları tələbilə etiraz aksiyası keçirirlər. Bu barədə Turan-a Azərbaycan vətəndaşları üçün yaradılan çadır düşərgəsinin sakinləri bildiriblər.

İyunun 16-da Azərbaycana cəmi 240 nəfərin buraxılacağı məlum olduqdan sonra vəziyyət gərginləşib. 

Adamlar hamının buraxılmasını tələb edirlər. Onların sayı isə 600 nəfərdir.

Bakı vaxtı ilə saat 21.30-a yaxın hamı çadır düşərgəsindən və digər müvəqqəti yaşayış yerlərindən çıxıb və asfalt zavodunun qarşısındakı meydanda toplaşıb.

Etirazçıların bir qismi marşla sərhəddə getməyə çalışıb.

Amma gələn polis qüvvələri onların yolunu kəsib və dəyənəklərlə toplaşanları dağıdır.

“Vəziyyət çox gərgindir. Polis sirenlərinin səsindən, adamların qışqırtısından uşaqlar, qadınlar çox qorxub. Bizim istəyimiz ancaq Vətənə qayıtmaqdır”, - etirazçılardan biri bildirib.—06D-