HRHF Qarabağ münaqişəsində gərginliyi aradan qaldırmağa çağırır

Bakı/30.09.20/Turan: “İnsan Hüquqları Evi” (HRHF) Dağlıq Qarabağ regionunda təmas xətti boyunca döyüş əməliyyatlarının bərpa edilməsi, bunun nəticəsində onlarla insanın həlak olması, çox sayda insanın ciddi xəsarətlər alması haqqında məlumatlardan narahatlığını bildirib.

“İsrarla gərginliyi aradan qaldırmağa çağırırıq və bütün tərəflərə xatırladırıq ki, münaqişənin nizamlanması səyləri normativ cəhətdən insan hüquqları sahəsində beynəlxalq standartlara söykənən və operativ olaraq insan hüquqlarının təşviqinə və müdafiəsinə yönəlmiş hüquq-müdafiə yanaşmasını da ehtiva etməlidir”, deyə müraciətdə bildirilir.

Universal insan hüquqları dəyərlərinə və insan ləyaqətinə hörmətə əsaslanan hüquq müdafiə təşkilatı olaraq HRHF zorakılığın tətbiqini və silahlı qarşıdurmaların bərpa edilməsini pisləyir və bütün tərəflərə xatırladır ki, insan hüquqlarına zəmanət müharibə zamanı tətbiq edilir və onlara hər zaman riayət olunmalıdır. Münaqişə tərəfləri beynəlxalq humanitar hüquqlara uyğun olaraq mülki əhalini, mülki obyektləri qorumalıdır.

“BMT Baş Katibi də daxil olmaqla, beynəlxalq ictimaiyyətin Azərbaycan və Ermənistan hökumətlərini danışıqlara qayıtmaq çağırışını alqışlayırıq və bir daha tərəfləri ATƏT-in Minsk Qrupunun həmsədrləri ilə ilkin şərtlər qoşmadan dialoqu bərpa etməyə çağırırıq”, deyə HRHF-nin bəyanatında bildirilir. -0-