İbrahim Məmmədov: Təcrid qaydalarının daha da sərtləşdirilməsi günün tələbinə çevrilməkdədir

Bakı/11.04.20/Turan: “İndiyə qədər hökumət sərt məhdudiyyətlərə getmək istəməyib. Baxmayaraq ki, bu bəlkə də ən asan yol kimi görünə bilər. Ona görə ki, vətəndaşların Xüsusi Karantin Rejiminin qaydalarına intizamla əməl edəcəyinə və sərt tədbirlərsiz də özünü təcridin səmərəsi olacağına inam var idi. Ancaq, bu günkü mənzərə göstərir ki, təcrid qaydalarının daha da sərtləşdirilməsi günün tələbinə çevrilməkdədir.”

Bu barədə Nazirlər Kabinetinin Mətbuat Xidmətinin rəhbəri İbrahim Məmmədov aprelin 11-də son vəziyyətlə bağlı açıqlamasında bildirib.

“İndiyə qədər Nazirlər Kabineti yanında Operativ Qərargah tərəfindən mövcud vəziyyət təhlil olunaraq qabaqlayıcı tədbirlərin nəticəsində bizdə yoluxmalar və ölümün sayı başqa ölkələrlə müqayisədə aşağı olaraq qalmaqdadır. Həkimlərin səyi nəticəsində xəstələri həyatda saxlamaq mümkün olur.

Yoluxmanın artıb-azalma tezliyi var. Yəni bəzən azalma müşahidə olunsa da, növbəti artım əvvəlki artım səviyyəsini üstələyir. Yoluxma sayı da sağalma sayından yüksək olaraq qalmaqdadır. Bu tendensiya tələb edir ki, yeni qabaqlayıcı addımlar atılsın.

Həkimlər də yoluxmanın qarşısının alınması üçün təcridin çox mühüm olduğunu deyirlər. Amma müşahidələr və faktlar da göstərir ki, vətəndaşlar özünütəcrid kimi çox vacib bir tələbə əməl etmirlər. Bu istiqamətdə də tendensiya ürəkaçan deyil. Məsələn, aprelin 8-də bir sutka ərzində 3 073 Xüsusi Karantin Rejiminin pozuntusu olub. Aprelin 10-da bu göstərici 3 112-yə yüksəlib. Bu gün, aprelin 11-dəisə artıq 1 sutka ərzində karantin qaydalarının pozuntusu 3 810-a yüksəlib. Bunlardan da 27-si inzibati həbs, biri cinayət işidir. 27 inzibati həbs cəzası isə göstərir ki, daha sərt məhdudlaşdırmalara gedilməsi məcburiyyəti yaranmaqdadır. "İcazə-e-gov.az portalına müraciət edilərək hərəkətinə icazə verilmiş 47 min nəfərin icazəsi artıq ləğv edilib," o qeyd edib.

Müşahidəçilər paytaxt Bakıda, Sumqayıt, Gəncə və digər böyük şəhərlərdə şəhərdaxili ictimai nəqliyyatın dayandırıla biləcəyini istisna etmir. Ekspertlər ölkədə aprel ayında koronovirusa yoluxmanın pik həddinə çatacağını güman edir.-0-