İ.Əliyev Türkiyənin xarici işlər, müdafiə nazirlərini və Kəşfiyyat İdarəsinin rəisini qəbul edib

Bakı/11.11.20/Turan: Noyabrın 10-da dövlət başçısı İlham Əliyev Türkiyənin xarici işlər naziri Mevlut Çavuşoğlunu, milli müdafiə naziri Hulusi Akarı və Milli Kəşfiyyat İdarəsinin rəisi Hakan Fidanı qəbul edib.

"Qələbədən sonra ilk görüşümdür, təbii ki, qardaşlarımla görüşdür. Bu gün səhər əziz Qardaşım, cənab Prezident Rəcəb Tayyib Ərdoğanla telefonla danışdıq, söhbət etdik, bu böyük qələbə münasibətilə bir-birimizi təbrik etdik", deyə Əliyev bildirib.

"Bütün bu 44 gün ərzində qardaş Türkiyənin dəstəyini biz hər an hiss edirdik, bütün Azərbaycan xalqı hiss edirdi... Bu, bizim müştərək qələbəmizdir", deyə o qeyd edib.

Bu gün əziz Qardaşımla söhbət əsnasında, eyni zamanda, Türkiyə-Rusiya birgə atəşkəsə nəzarət mərkəzinin fəaliyyəti ilə də bağlı fikir mübadiləsi apardıq. Hesab edirəm ki, bu da çox önəmli addımdır. Bu, bölgədə iş birliyinin yeni formatıdır. Biz bunu hər zaman istəyirdik ki, Türkiyə və Rusiya Ermənistan-Azərbaycan Dağlıq Qarabağ münaqişəsində bərabər səviyyədə rol alsınlar və bu gün biz buna nail olduq", deyə Əliyev qeyd edib.

Mərkəz qısa müddət ərzində yaradılmalıdır, ayın sonuna qədər erməni silahlı qüvvələri işğal edilmiş əraziləri azad etməlidir, cədvəl artıq tərtib edilib və bu mərkəzin yaradılmasında çox fayda var, deyə Əliyev qeyd edib.

Öz növbəsində, Türkiyə XİN başçısı Mevlut Çavuşoğlu Azərbaycanı türkün gücünü göstərən qələbə münasibətilə təbrik edib.

Ermənistan sülh yolu ilə həll təkliflərindən imtina edib, indi qoy dərs çıxarsınlar, deyə o bildirib.

Bundan sonrakı addımları, o cümlədən birgə nəzarət mərkəzinin yaradılmasını birlikdə müzakirə edəcəyik. "Sizin göstəriş və tapşırıqlarınıza uyğun olaraq biz də həmkarlarımızla birlikdə lazımi işləri görəcəyik. Bu məqsədlə bu gün qəbulunuza, tapşırıqlarınızı almağa gəldik", deyə Çavuşoğlu bildirib. -02D-