İ.Əliyev yeni XİN başçısına xarici siyasət prioritetləri haqqında təlimatlar verib

Bakı/16.07.20/Turan: İyulun 16-da dövlət başçısı video-konfrans rejimində yeni XİN başçısı Ceyhun Bayramova təlimat verib.

Söhbətin prezidentin saytında yerləşdirilmiş stenoqramına görə, Əliyev XİN-də kadr dəyişikliklərinin zəruri olduğunu deyib. “Kadr siyasətində şəxsi tanışlıq, rəğbət, dostluq əlaqələri yox, peşəkarlıq, vətənpərvərlik və milli dəyərlər əsas olmalıdır… Bizim xarici nümayəndəliklərdə görülən işlər ciddi təhlil olunmalıdır, səfirliklərin işinin səmərəlilik əmsalı müəyyən edilməlidir. Bəzi hallarda bizim səfirliklərimizdə çalışan insanlar öz işinə laqeyd yanaşırlar, passiv olurlar, ölkəmizin maraqlarını lazımi səviyyədə müdafiə və təmin edə bilmirlər”, deyə Əliyev bildirib… Xarici kütləvi informasiya vasitələri ilə sıx təmaslar olmalıdır”, deyə Əliyev bildirib.

O, Azərbaycana qarşı çirkin kampaniya aparılır, səfirliklər isə buna adekvat reaksiya vermir.

Xüsusən, o, siyasi mühacirləri yada salıb. “Bizim xüsusi xidmət orqanlarımız tərəfdaş ölkələrin xüsusi xidmət orqanlarına dəfələrlə bu haqda məlumatlar vermişlər. Demişlər ki, biz bilirik, filan adamı siz istiqamətləndirirsiz, filan adama siz ev vermisiniz, filan adamın çirkin çıxışları sizin idarənizdə yazılır. Biz bütün bunları bilirik. Bir daha demək istəyirəm ki, bu, o ölkələrin riyakarlığını göstərir. Çünki mən bu haqda dəfələrlə demişəm. Bir tərəfdən bizə dostluq siqnalları göndərilir, üzdə tərəfdaşlıq haqqında sözlər deyilir, amma, əslində, bizə qarşı kampaniya aparılır. Bunun da məqsədi Azərbaycanı zəiflətmək, Azərbaycanı sarsıtmaq, Azərbaycanı ləkələmək, Azərbaycan rəhbərləri haqqında olmayan yalanları yaymaqdır. Ancaq həyat artıq göstərir ki, bunun heç bir əhəmiyyəti yoxdur. Çünki Azərbaycan xalqı hər şeyi yaxşı bilir. Bilir ki, bu gün bizim fəaliyyətimizdə Azərbaycan xalqının maraqları hər şeydən üstündür. Çox güman ki, məhz buna görə bizə qarşı bəzi hallarda belə çirkin üsullardan istifadə edilir. Bilirsiniz, müxtəlif vaxtlarda bu üsulların məzmunu və formaları dəyişirdi. Vaxtilə dırnaqarası “müstəqil” qeyri-hökumət təşkilatları vasitəsilə bizə hücumlar edilirdi. Halbuki hər kəs yaxşı bilir ki, bu qeyri-hökumət təşkilatları hansı mənbələrdən maliyyələşir - böyük dövlətlərin xarici siyasət orqanları tərəfindən maliyyələşir.

Bu, düşünülmüş siyasətdir. Bizim diplomatlarımız buna qarşı fəaliyyət göstərməlidirlər. Əfsuslar olsun ki, bizim Xarici İşlər Nazirliyində son vaxtlar bu prinsip əsas rol oynayır”, deyə Əliyev bildirib.

Digər ölkələrlə qarşılıqlı münasibətlərə toxunan Əliyev Avropa İttifaqı ilə ikitərəfli saziş haqqında danışıqları yada salıb. “Sazişin böyük hissəsi razılaşdırılıb. Siz dərhal bu məsələ ilə məşğul olun və bu gün hələ ki, razılaşdırılmamış məsələlərə fikir verin. Hesab edirəm ki, Azərbaycan maksimum dərəcədə konstruktivlik göstəribdir və bu gün hələ də razılaşdırılmamış məsələlər var. Bizim üçün indiki formada onları qəbul etmək deyə bilərəm ki, çox çətin və əhəmiyyətsiz olacaqdır. Biz öz maraqlarımızı qorumalıyıq. Biz maraqlarımıza zidd olan sənədi imzalamayacağıq. Amma kompromis üçün yer var”, deyə o bildirib.

Daha sonra o, ABŞ ilə bütün sahələrdə münasibətlərin və Böyük Britaniya ilə münasibətlərin əhəmiyyətindən danışıb.

“Əlbəttə, fəaliyyətinizin əsas hissəsi Ermənistan-Azərbaycan Dağlıq Qarabağ münaqişəsinin həllinə istiqamətləndiriləcək. Bu, bizim üçün əsas məsələdir, bu, milli məsələdir. Bizim mövqeyimizdə, qeyd etdiyim kimi, heç bir dəyişiklik ola bilməz. Dağlıq Qarabağ bizim tarixi torpağımızdır və ölkəmizin ərazi bütövlüyü bərpa edilməlidir. biz imitasiya naminə danışıqlar aparmaq, mənasız videokonfranslar keçirmək fikrində deyilik. Bunun mənası olmalıdır.

Ermənistan danışıqlar formatını dəyişmək, danışıqların mahiyyətini pozmaq istəyir”, deyə Əliyev qeyd edib və yeni nazirə uğurlar arzu edib. -02D-