İki vətəndaş Ermənistan-Azərbaycan sərhədində vəziyyət haqqında yalan məlumat yaydıqlarına görə məsuliyyətə cəlb olunub

Dövlət Təhlükəsizliyi Xidməti sosial şəbəkələrdə cəmiyyətdə narahatlıq yaranmasına səbəb olan məlumatları yayan Azərbaycan vətəndaşları Rəşad Əliyev və Pərviz Məlikova qarşı zəruri hüquqi prosedur tədbirlər həyata keçirib. 

Bu barədə Medianın İnkişafı Agentliyi və Dövlət Təhlükəsizliyi Xidmətinin məlumatında deyilir.

Məlumatda bildirilir ki, son günlər bəzi sosial şəbəkələrdə Azərbaycan-Ermənistan sərhədində gərginliyin artması, Azərbaycan Ordusunda şəhidlərin və yaralıların olması, qoşun birləşmələrinin və ağır artilleriya silahlarının hazırlıq vəziyyətinə gətirilməsi, Laçın rayonu ərazisində komendant saatının tətbiq edilməsi ilə bağlı bu şəxslər tərəfindən əsassız məlumatlar, reallığı əks etdirməyən saxta xəbərlər yayılıb.

Medianın İnkişafı Agentliyi və Dövlət Təhlükəsizliyi Xidməti sözügedən əməllərin törədilməsinin ciddi hüquqi məsuliyyətə səbəb olduğuna dair xəbərdarlıq edərək media subyektlərini və jurnalistləri sosial şəbəkələrdə yayımlanan qeyri-dəqiq, mənbəyi bilinməyən məlumatlardan istifadə etməməyə, vətəndaşları bu kimi hallara qarşı hər zaman prinsipiallıq nümayiş etdirməyə, sosial şəbəkələrdə yayılan, rəsmi mənbələrə söykənməyən əsassız informasiyalara inanmamağa çağırır.