İlham Əliyev: İran ermənilərdən fərqli olaraq, etnik azərbaycanlıların öz dilində təhsil almasına imkan vermir

Bakı/25.11.22/Turan: Prezident İlham Əliyev noyabrın 25-də Bakıda ADA Universitetində keçirilən "Orta Dəhliz boyunca: geosiyasət, təhlükəsizlik və iqtisadiyyat" mövzusunda beynəlxalq konfransdakı çıxışında İranda yaşayan azərbaycanlıların ana dilində təhsil ala bilməməsini tənqid edib.

Əliyev İranda yaşayan azərbaycanlıların ana dilində təhsil almasının vacibliyi məsələsini belə diqqətə çatdırıb: "Azərbaycanda tədrisin rus dilində aparıldığı 340 məktəb fəaliyyət göstərir. Bununla yanaşı, respublikada 10 məktəbdə tədris gürcü dilindədir. Gürcüstanda 116 azərbaycandilli məktəb var. İranda tədrisin erməni dilində aparıldığı məktəblər var, ancaq Azərbaycan dilində tədrisin olduğu məktəb yoxdur. Bu, necə ola bilər? Əgər kimsə deyir ki, bu, daxili işlərə müdaxilədir, biz bunu tamamilə rədd edirik. Azərbaycanın xarici siyasəti gün kimi aydındır – biz heç bir dövlətin daxili işinə qarışmamışıq və qarışmırıq. "Biz İran məktəblərində Azərbaycan dilində tədris məsələsini ona görə qaldırırıq ki, əks təqdirdə, ana dilində danışan İran azərbaycanlıları dilin ədəbi komponentini itirirlər və Azərbaycan dili sadəcə məişət səviyyəsində qalır", deyə o qeyd edib. 03