İlham Əliyev region ölkələrinə yardımın ədalətsiz bölünməsinə görə Aİ-ni tənqid edir

Bakı/23.07.21/Turan: Prezident İlham Əliyev Avropa İttifaqının region ölkələrinə maddi yardım göstərilməsi üzrə mövqeyini “ədalətsiz” adlandırıb. O, AzTV dövlət televiziyasına müsahibəsində Ermənistana 2,6 milyard avro, Gürcüstana 2,3 milyard avro ayrılması barədə məlumatları şərh edib.

“Azərbaycana gəldikdə, 150 milyon avro rəqəmi səsləndirildi, amma konkret bizə deyilmədi bu, nə rəqəmdir və nə vaxt veriləcək, verilməyəcək, bunun şərtləri nədir? Əlbəttə, mən hesab edirəm ki, bu, ədalətsiz mövqedir. Çünki Azərbaycan Cənubi Qafqazın ən böyük ölkəsidir həm ərazisi, həm əhalisi, həm də potensialı baxımından. Bu günə qədər Cənubi Qafqaz ölkələrinə belə böyük məbləğdə vəsait verilmirdi. Yəni bu, onu göstərir ki, bu vəsait məhz müharibədən sonra verilir”, deyə Əliyev bildirib.

O, Azərbaycanın müharibədən ən çox əziyyət çəkən ölkə olduğuna diqqət çəkib. Azərbaycanın 10 min kvadrat kilometrlik ərazisi “tamamilə dağıdılıb, erməni vandalları tərəfindən məhv edilib”, deyə prezident bildirib.

100 minlərlə mina döşənilib və bütün binalar, tarixi binalar, bütün infrastruktur məhv edilib. Amma pulu nə dağıntı, nə minalanmış ərazi olmayan Ermənistana verirlər.

Əliyevin sözlərindən aydın olub ki, o, bu mövzunu Şarl Mişellə müzakirə edib. “Cavab elə oldu ki, Azərbaycana elə bil ki, vəsait lazım deyil. Birincisi, bizə heç kim təklif etməyib… Bəs azad edilmiş torpaqları biz bərpa edəsi deyilik? Milyardlarla dollar vəsait lazımdır, o, göydən düşür?.. Bəli, biz özümüzü təmin edən ölkəyik. Amma əgər bizə də Ermənistan kimi qrant olaraq vəsait verilsə, biz heç vaxt imtina etmərik, deyə Əliyev bildirib. -06D-