İlham Əliyev Türkiyənin hərbi rəhbərlərini qəbul edib

Bakı/26.06.18/Turan: Prezident İlham Əliyev bu gün, iyunun 26-da Türkiyə Silahlı Qüvvələrinin Baş Qərargah rəisi Hulusi Akarı və müdafiə naziri Nurettin Caniklini qəbul edib.

Ölkə başçısının rəsmi internet səhifəsi xəbər verir ki, görüş zamanı iki ölkə arasındakı əməkdaşlığın perspektivləri ətrafında fikir mübadiləsi aparılıb.

İlham Əliyevin Türkiyədə keçirilən seçkilərdə Rəcəb Tayyib Ərdoğanın qələbəsi ilə bağlı təbriklərini çatdırdığı, bu qələbənin xalqın Türkiyə prezidentinin rəhbərliyi ilə son illər görülmüş işlərə verdiyi qiymətin yüksək təzahürü olduğunu vurğuladığı bildirilir.

Prezident Azərbaycan ilə Türkiyə arasında dostluq və qardaşlıq münasibətlərinin bütün sahələrdə, o cümlədən müdafiə sahəsində bundan sonra da uğurla inkişaf edəcəyinə əminliyini ifadə edib.

Görüş zamanı iki ölkə arasındakı münasibətlərin perspektivlərinin müzakirə edildiyi bildirilir.--0--