İlham Əliyev və Sergey Lavrov Qarabağ nizamlanmasını müzakirə ediblər

Bakı/03.12.19/Turan: Dekabrın 2-də Bakıda Azərbaycan prezidenti İlham ƏLiyevin RF XİN başçısı Sergey Lavrovla görüşünün müzakirə mövzularından biri Qarabağ nizamlanması olub.

Qonağı salamlayan Əliyev deyib ki, ötən il "münasibətlərimiz üçün çox uğurlu olub". Biz bir sıra istiqamətlər üzrə əhəmiyyətli dərəcədə irəliləmişik, beynəlxalq təşkilatlarda bir-birimizi fəal dəstəkləməklə qarşılıqlı siyasi əlaqələri möhkəmlətmişik. Deməliyəm ki, Azərbaycan nümayəndə heyəti tam heyətdə Rusiyanın AŞPA-ya qayıtmasının lehinə səs verib və beləliklə, həmrəyliyini bildirib. Biz də həmişə beynəlxalq strukturlarda bizi narahat edən məsələlərlə bağlı Rusiya Federasiyasının dəstəyini hiss edirik", deyə prezident qeyd edib.

O, həmçinin "Mehriban Əliyevanın Rusiyaya rəsmi səfərini uğurlu" adlandırıb.

Onun fikrincə, ilin yekunlarına görə ticarət dövriyyəsinin artımı təxminən 25 faiz olacaq.

"Əlbəttə ki, səfər çərçivəsində biz Ermənistan ilə Azərbaycan arasında münaqişənin nizamlanması problemləri barədə danışacağıq. Təəssüf ki, bu istiqamətdə nəzərəçarpan nəticələr olmayıb. Hesab edirəm ki, bunun əsas səbəbi Ermənistan rəhbərliyinin səmərəsiz siyasəti, xüsusən, “Qarabağın Ermənistan olması” barədə bəyanatıdır. Şadam ki, həm sizin tərəfinizdən, həm də digər ölkələrdən olan həmsədrlər tərəfindən, yumşaq desək, bu qəribə bəyanata düzgün qiymət verilib. Biz Minsk qrupunun həmsədrləri ilə əməkdaşlığı davam etdirəcəyik. Yaxın vaxtlarda Azərbaycanın və Ermənistanın Xarici İşlər nazirlərinin görüşü olacaq. Biz ümidvarıq ki, siz danışıqlar prosesində fəal iştirakınızı davam etdirəcəksiniz", deyə Əliyev sözünə davam edib.

Öz növbəsində, Lavrov ikitərəfli münasibətlərin inkişafından məmnunluğunu ifadə edib, gündəliyə yeni mövzu - innovasiya və yüksək texnologiyalar mövzusu əlavə olunduğunu və yaxın gələcəkdə bu istiqamətdə xüsusi "yol xəritəsi" yaradılacağını qeyd edib. Artıq bir neçə gündən sonra Hökumətlərarası Komissiya bu sahədə işlərin vəziyyətini nəzərdən keçirəcək.

Lavrovun fikrincə, ilin sonuna doğru ticarət dövriyyəsi 3 mlrd. dollara yaxın olacaq. Rusiya Federasiyasının Azərbaycan iqtisadiyyatına birbaşa investisiyalarının həcmi 1,5 milyard dollar olub. Rusiya Federasiyasının 70-dən çox subyekti Azərbaycanla əməkdaşlıq edir. Azərbaycanda Rusiya kapitalının iştirakı ilə 300-dən çox müəssisə fəaliyyət göstərir. Rusiyada da Azərbaycan kapitalı öz mövqelərini getdikcə möhkəmlədir.

"Mehriban Arif qızı Əliyevanın Rusiya Federasiyasına səfərinin daha bir maraqlı və hesab edirəm ki, çox vacib nəticəsi Rusiya-Azərbaycan Gənclər Forumunun daha müntəzəm keçirilməsi barədə razılaşma oldu. Bu, varislik baxımından, tarixi yaddaşın qorunub saxlanması və həm Rusiyada, həm də Azərbaycanda bizim gənc nəslin münasibətlərimizə həmişə xas olmuş dostluq, mehriban qonşuluq ruhunda tərbiyəsi baxımından prinsipial əhəmiyyət kəsb edir", deyə Lavrov sözünə davam edib. 

O, Qarabağ nizamlanmasına toxunaraq,  "həm Vyana sammitində, həm sonradan nazirlərin Moskva görüşündə etimad tədbirləri, humanitar əlaqələrin, kütləvi informasiya vasitələri xətti ilə əlaqələrin nizamlanması barədə əldə edilmiş razılaşmaların bu il təsdiqlənməsində və həyata keçirilməsində" maraqlı olduqlarını bildirib. "Onlar tədricən reallaşır və ümidvaram ki, Azərbaycan və Ermənistan xarici işlər nazirlərinin bu həftə keçiriləcək görüşü bu prosesləri əlaqələndirməyə imkan verəcək", deyə Lavrov qeyd edib. 

O, Əliyevin "siyasi nizamlama, uzunmüddətli nizamlama baxımından hələ çox iş görülməli olduğu" barədə fikri ilə razı olduğunu bildirib. "Burada Sizin bu tezisinizi tam dəstəkləyirəm ki, hər iki tərəfin bəyəndiyi əsas prinsiplərə, BMT Nizamnaməsində və Helsinki Yekun Aktında təsbit olunmuş prinsiplərə zidd olan ritorikadan çəkinmək lazımdır", deyə Lavrov bildirib. -06В-