İqbal Əbilov təqsirsiz olduğunu bəyan edib

Avqustun 7-də Səbail Rayon Məhkəməsində Dövlət Təhlükəsizliyi Xidmətinin (DTX) İstintaq Təcridxanasında saxlanılan talış dili tədqiqatçısı İqbal Əbilovun şikayətinə baxılıb. O, yaxınları ilə görüş istəyib və telefon danışıqlarının qadağan olunmasından şikayətlənib.

Vəkil Rövşanə Rəhimovanın sözlərinə görə, məhkəmə onun şikayətini təmin etməyib.

Müdafiə tərəfi telefon danışıqları və yaxınları ilə görüşə qadağa qoyulmasını əsassız sayır və məhkəmənin qərarlarından apellyasiya şikayəti vermək niyyətindədir.

Əbilov özünü təqsirli bilmir.

“O, özünü təqsirli bilmir və ona dəstək olan hər kəsə minnətdardır”, - deyən vəkil Əbilovun saxlanma şəraitindən şikayətinin olmadığını bildirib.

*İqbal Əbilov iyulun 22-də qohumlarını ziyarət etmək üçün Azərbaycana gələn zaman saxlanılıb. O, Azərbaycan Cinayət Məcəlləsinin 274-cü (dövlətə xəyanət), 281.3-cü (xarici təşkilatların və ya onların nümayəndələrinin göstərişi ilə dövlət əleyhinə yönələn açıq çağırışlar) və 283.1-ci (milli, irqi, sosial və ya dini nifrət və düşmənçiliyin salınması) maddələri ilə ittiham olunub.

Bütün bu cinayətlərin Ermənistan xüsusi xidmət orqanlarının göstərişi ilə törədildiyi iddia edilir.

Əbilov ittihamları rədd edir və sırf elmi fəaliyyətlə məşğul olduğunu bildirir.

Dünyanın müxtəlif ölkələrindən böyük bir qrup alim Azərbaycan rəhbərliyinə müraciət edərək Əbilovun azadlığa buraxılmasına köməklik göstərilməsini xahiş edib.