İran SQ Baş Qərargah rəisi Bakıya gəlir

Bakı/15.01.19/Turan: İran Silahlı Qüvvələrinin Baş Qərargah rəisi Məhəmməd Bağerinin başçılıq etdiyi yüksək vəzifəli hərbi nümayəndə heyəti çərşənbə günü Bakıya gələcək. Bu barədə bu gün onun müavini Qədir Entezami bildirib. Onun sözlərinə görə, səfər Azərbaycanın müdafiə naziri Zakir Həsənovun dəvəti ilə baş tutacaq, xəbəri İRNA agentliyi yayıb.

İki günlük səfər çərçivəsində Bağerinin Azərbaycan prezidenti, baş naziri və parlament spikeri ilə görüşləri planlaşdırılır.

Hərbi sahədə və müdafiə sahəsində əməkdaşlığın inkişafı məsələləri müzakirə olunacaq.

İran və Azərbaycanın tarixi və mədəni münasibətlərini qeyd edən Entezami qeyd edib ki, hər iki ölkə regionun sabitliyinin və təhlükəsizliyinin təmin edilməsində əsas rol oynayır.

İran və Azərbaycan SQ-nin ortaq sərhədlərdə və Xəzər dənizində təhlükəsizliyin bərqərar olunması ilə bağlı mövqeyinə istinad edən Entezami İran SQ Baş Qərargah rəisinin Bakıya səfərinin əhəmiyyətli olduğunu qeyd edib.

Səfərin yekunlarına görə iki ölkə arasında müdafiə sahəsində əməkdaşlıq haqqında qarşılıqlı anlaşma memorandumunun imzalanacağı gözlənilir. -02D-