İran SQ-nin Baş Qərargah rəisi qoşunların Azərbaycanla sərhəddə cəmləşdirildiyini təkzib edir

Bakı/13.09.23/Turan: Sentyabrın 13-də Azərbaycanın müdafiə naziri Zakir Həsənovla İran İslam Respublikasının Silahlı Qüvvələrinin Baş Qərargah rəisi general-leytenant Məhəmməd Hüseyn Baqeri arasında telefon danışığı olub.

Azərbaycan Müdafiə Nazirlinin mətbuat xidmətinin məlumatına görə, tərəflər regiondakı vəziyyət və təhlükəsizlik məsələləri ilə bağlı ətraflı fikir mübadiləsi aparıblar.

"Baqeri öz növbəsində bəzi qüvvələrin ölkələrimiz arasında mövcud olan dostluq və mehriban qonşuluq münasibətlərinə xələl gətirmək məqsədilə guya İranın Azərbaycanla sərhədə canlı qüvvə və hərbi texnika toplaması, müxtəlif təlimlər həyata keçirməsi ilə bağlı yaydıqları yalan məlumatların heç bir real əsası olmadığını vurğulayıb", deyə məlumatda bildirilir.

Telefon danışığı zamanı həmçinin ölkələrimiz arasında hərbi əməkdaşlığın inkişaf perspektivləri də müzakirə olunub, deyə Azərbaycan Müdafiə Nazirliyinin mətbuat xidməti qeyd edir. 0