İranın xüsusi nümayəndəsi Bakıya Çelik diplomatiyası çərçivəsində gəlib

Bakı/28.10.20/Turan: İranın xarici işlər nazirinin müavini Abbas Arakçi İranın hazırladığı Qarabağ münaqişəsinin nizamlanması planının müzakirə edilməsi məqsədilə Bakıda məsləhətləşmələr aparır.

“Azərbaycan torpaqlarının işğalına son qoyulması, azlıqların hüquqlarının və insan hüquqlarının müdafiəsi  İranın planının əsas amilləridir”, deyən İranlı diplomat əlavə edib ki, bu plan mərhələli şəkildə həyata keçirilə bilər, xəbəri İRNA agentliyi yayıb.

O qeyd edib ki, İranın planının digər bir hissəsi hərbi əməliyyatlara son qoyulmasından və nüfuzlu ölkələrin iştirakı ilə danışıqlara başlanmasından ibarətdir. Nazir müavini Tehranın bu planla bağlı region ölkələri ilə məsləhətləşmələr aparmaq niyyətində olduğunu vurğulayıb.

Arakçi İranı və Azərbaycanı iki dost ölkə adlandırıb, Tehranın Bakının işğal edilmiş torpaqlarını və şəhərlərini azad etmək səylərini dəstəklədiyini əlavə edib. “Azərbaycanın və digər ölkələrin ərazi bütövlüyü və sərhədlərin dəyişməzliyi mübahisəolunmaz məsələdir”, deyə o qeyd edib.

İRNA-nın məlumatına görə, Arakçi Azərbaycanın vitse-prezident Şahin Mustafayev, XİN başçısı Ceyhun Bayramov və prezidentin köməkçisi Hikmət Hacıyevlə məsləhətləşmələr aparacaq.

Arakçı Bakıdan sonra Moskvaya, Yerevana və Ankaraya səfər edəcək və İranın Qarabağ münaqişəsinin nizamlanması üzrə təşəbbüsünü təqdim edəcək. -02D-