İsrail aqrar sahədə təcrübəsini Azərbaycanla bölüşməyə hazırdır

Bakı/17.05.22/Turan: Azərbaycan və İsrail arasında iqtisadi münasibətlər, aqrar sahədə ikitərəfli əməkdaşlığın perspektivləri bu gün Bakıda prezident İlham Əliyevin yəhudi dövlətinin kənd təsərrüfatı naziri Oded Forer ilə görüşündə müzakirə olunub.

Tərəflər İsrailin müasir texnologiyalarının Azərbaycanın kənd təsərrüfatında tətbiqi ilə bağlı fikir mübadiləsi aparıblar, bu barədə rəsmi məlumatda deyilir.

Əliyev yerli kənd təsərrüfatı istehsalının və ixracatın əhəmiyyətli dərəcədə artdığını vurğulayıb, eyni zamanda, idxaldan asılılığın maksimum dərəcədə azaldılması istiqamətində də işlərin həyata keçirildiyini deyib.

O, işğal dövründə ermənilərin ekoloji soyqırım törətdiyi, su mənbələrindən məhrum etdiyi işğaldan azad edilmiş ərazilərdə su mənbələrinin bərpası və irriqasiya sistemi ilə bağlı genişmiqyaslı işlərin planlaşdırıldığını qeyd edib.

Oded Forer kənd təsərrüfatı sahəsində ölkələrimizin müvafiq qurumları arasında yaxşı əməkdaşlığın mövcud olduğunu deyib, Bakıda keçiriləcək "Caspian Agro 2022" - Beynəlxalq Kənd Təsərrüfatı Sərgisinin əhəmiyyətini qeyd edib.

Nazir İsrailin kənd təsərrüfatı sahəsində təcrübəsini azərbaycanlı həmkarları ilə bölüşməyə hazır olduğunu bildirib, Azərbaycanın Qarabağ regionunda da əməkdaşlıq üçün yaxşı potensial olduğunu vurğulayıb. -06B-