İsrailin Azərbaycandakı səfirliyinə qarşı terror aktı cəhdinin arxasında İran dayanır - E.Kohen

Bakı/13.07.23/Turan: Azərbaycanda İsrail səfirliyinə terror cəhdinin arxasında İran dayanır.

Bu barədə "Times of İsrael" nəşri İsrailin xarici işlər naziri Eli Kohenə istinadən məlumat verib.

XİN rəhbəri Serbiyaya rəsmi səfəri zamanı verdiyi açıqlamada Tehranın terror hücumu cəhdinə görə məsuliyyət daşıdığını bildirib.

İsrailli nazirin sözlərinə görə, Azərbaycanda ələ keçirilən terrorçu İrandan maliyyələşib və oradan bu təlimatı alıb.

"İran terroru qlobal təhlükədir, bunu biz son bir neçə gündə Azərbaycanda, İsrailin Bakıdakı səfirliyinə hücum cəhdində, eləcə də son aylarda Kipr və Yunanıstanda israillilərə və yəhudilərə qarşı hücum cəhdlərində gördük", deyə Kohen qeyd edib.

Azərbaycan Dövlət Təhlükəsizliyi Xidmətinin ictimaiyyətlə əlaqələr şöbəsinin iyulun 10-da yaydığı məlumatında deyilir ki, Əfqanıstan vətəndaşı Favzan Musa Xanın (Fawzan Mosa Khan) digər şəxslərlə qabaqcadan əlbir olaraq Azərbaycan ərazisində ictimai sabitliyi pozmaq, əhali arasında vahimə yaratmaq, dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə partlayış, yanğın və ya digər bu kimi hadisələrlə müşayiət olunacaq, insanların həlak olması, onların sağlamlığına zərər yetirilməsi, əhəmiyyətli əmlak ziyanının vurulması və başqa ictimai təhlükəli halların baş verməsi ilə nəticələnəcək terror aktı törətməyi planlaşdırması müəyyən edilib.

"Favzan Musa Xan cinayət əməllərini törətmək niyyəti ilə xarici ölkədən Azərbaycana gəlmiş, Bakı şəhərində yaşadığı müddətdə üçüncü dövlətin ölkəmizdəki səfirliyinin yerləşdiyi ərazinin koordinatlarını müəyyənləşdirmək və terror aktını planlaşdırmaq məqsədilə səfirliyin binasının ətrafında müşahidə aparmış, terror aktında iştirak edə biləcək şəxslərin müəyyən edilərək bu fəaliyyətə cəlb olunması, odlu silah və partlayıcı maddələrin əldə edilməsi, bu məqsədlərlə maliyyə dəstəyinin alınması üçün digər şəxslərlə əlaqəyə girərək sövdələşmişdir", deyə məlumatda qeyd edilirdi.

DTX Favzan Musa Xanın Hyatt Regency mehmanxana kompleksi ətrafındakı ərazidə müşahidə aparmasının videogörüntüsünü yayıb. Digər müəssisələrlə yanaşı, İsrail səfirliyi də bu binada yerləşir. 16B