İstintaq təcridxanasında Ələsgər Məmmədlinin vəziyyətini sabitləşdirmək mümkün deyil

“Toplum” TV-nin təsisçisi Ələsgər Məmmədli həkimin təyin etdiyi dərmanları qəbul etsə də, qan təzyiqini sabitləşdirmək mümkün deyil və 175/100 səviyyəsində qalır. Bu barədə Turan-a onun qardaşı Nəsimi Məmmədli bildirib.

İsti havada qapalı  məkanda saxlanması onun sağlamlıq problemlərini daha da artırıb.

Məmmədlinin üzləşdiyi ədalətsizlik və haqsızlıq onun sinir sisteminə mənfi təsir göstərib. Qalxanabənzər vəzdəki şiş hələ də nəfəs almağı çətinləşdirir və yuxu rejimini pozur. Dərmanla müalicəyə baxmayaraq, müsbət nəticələr yoxdur.

"Həkimlər qalxanabənzər vəzdə cərrəhi əməliyyat tövsiyə etdilər. Lakin Ələsgər əməliyyatın güc qurumlarının nəzarəti altında aparılmasını istəmir. Çünki iyunun 22-də onu biopsiya müayinəsi üçün özəl klinikaya aparanda təhlükəsizlik qüc qurumlar faktiki olaraq həkimlərin işinə mane olublar", - Nəsimi Məmmədli deyib.

Bundan əlavə, Ələsgər saxlanılarkən mobil telefonunu götürüblər və o, Asan İmza (elektron imza) vasitəsilə vergi hesabatlarını təqdim edə bilmir. Ailə üzvlərinə etibarnamə verməlidir ki, onun əvəzinə hesabatı təhvil versinlər. Ancaq buna icazə vermirlər.

Belə ki, istintaq təcridxanasında etibarnamə vermək üçün notarius dəvət etmək olar, lakin 6 aydır ki, Ələsgərin bu hüquqdan istifadə etməsinə icazə verilmir.

Penitensiar Xidmətdən şərh almaq mümkün olmayıb.

Получить комментарии в Пенитенциарной службе не удалось.

*Martın 6-8-də “Toplum” TV və onun tərəfdaş təşkilatı Demokratik Təşəbbüslər İnstitutunun 9 əməkdaşı saxlanılıb. Onlar xarici valyuta qaçaqmalçılığında ittiham olunublar. Yeddi nəfər həbs edilib, iki nəfər polis nəzarətinə verilib.

“Toplum” TV-nin təsisçisi Ələsgər Məmmədli də valyuta qaçaqmalçılığında ittiham olunub. Onun mənzilində axtarış zamanı guya 7300 avro tapılıb.

İyunun 14-də Xətai məhkəməsi onun özəl klinikada tibbi müayinə olunması barədə vəsatəti təmin edib.