Japarov Əliyevin səfərinin yekunlarından razıdır

Bakı/11.10.22/Turan: Çərşənbə axşamı Qırğızıstan prezidenti Sadır Japarov Azərbaycan prezidenti İlham Əliyevin rəsmi səfərinin yekunlarından məmnunluğunu bildirib.

“Strateji tərəfdaşlıq ruhunda dövlətlərimiz arasında ikitərəfli və çoxtərəfli əməkdaşlığın aktual məsələlərinə dair məzmunlu danışıqlar apardıq, qarşılıqlı maraq doğuran beynəlxalq və regional məsələlər ətrafında fikir mübadiləsi oldu. Danışıqlar dövlətlərimiz arasında qardaşlıq münasibətlərini səciyyələndirən tam qarşılıqlı anlaşma, açıqlıq və etimad şəraitində keçdi. Biz strateji tərəfdaşlığın aktivləşdirilməsi və genişləndirilməsi istiqamətində kursun dəyişməzliyini təsdiq etdik”, - Japarov bildirib.

O qeyd edib ki, Dövlətlərarası Şuranın fəaliyyətə başlaması və bu gün imzalanmış sazişlər siyasi, ticarət və investisiya sahələrində əməkdaşlığımızın fəal inkişafının bariz göstəricisidir.

«Diplomatik münasibətlərin qurulmasının 30-cu ildönümü ərəfəsində növbəti mərhələ kimi birgə inkişaf fondunun fəaliyyətinin sürətləndirilməsi, əməkdaşlığın inkişafı üzrə 5 illik kompleks proqramın imzalanması və 2023-cü ildə Azərbaycanda Qırğızıstan Mədəniyyəti Günlərinin, 2024-cü ildə isə Qırğızıstanda Azərbaycan Mədəniyyəti Günlərinin keçirilməsi barədə razılığa gəldik”, - o deyib.

Japarov “ikitərəfli münasibətlərimin gələcək inkişafının çox müsbət olacağına” əminliyini ifadə edib.—0--