JMK Azərbaycan hakimiyyətini jurnalistlərə qarşı son zorakılıq hallarını araşdırmağa çağırıb

Bakı/03.07.23/Turan: Nyu Yorkda yerləşən Jurnalistləri Müdafiə Komitəsi (JMK) Azərbaycan hakimiyyətini etiraz aksiyalarının maneəsiz işıqlandırılması üçün şərait yaratmağa və polisin mətbuat nümayəndələrinə qarşı zorakılığını araşdırmağa çağırıb.

İyunun 22-dən etibarən Azərbaycanda polis Azərbaycanın qərbində Söyüdlü kəndində ekoloji etirazları işıqlandıran ən az altı jurnalisti saxlayıb, döyüb, təhdid edib və ya başqa yolla onların işinə mane olub, deyə JMK-nin bəyanatında bildirilir.

KİV-lərin məlumatına görə, iyunun 20-də Söyüdlü kəndində yerli qızıl mədəninə qarşı etirazlar qızışdıqdan sonra polis iyunun 22-dən etibarən kəndə girişi məhdudlaşdırıb, oraya yalnız yerli sakinlərin və hökumətyönlü KİV nümayəndələrinin girişinə icazə verib.

"Azərbaycan hakimiyyətinin davam edən ekoloji etirazların və polisin amansızlıqlarının işıqlandırılmasının qarşısını almaq və beləliklə senzura tətbiq etmək cəhdləri ikrah doğurur və onlara dərhal son qoyulmalıdır", deyə JMK-nin Avropa və Mərkəzi Asiya üzrə koordinatoru Gülnoza Said bildirib. "Hakimiyyət bütün jurnalistlərin mətbuatda işıqlandırılmalı olan hadisələri işıqlandırmasına icazə verməli və polis tərəfindən mətbuat nümayəndələrinə qarşı zorakılıq və təhdid haqqında bütün bəyanatları açıq şəkildə araşdırmalıdır".

İyunun 22-də Söyüdlüdəki nəzarət-buraxılış məntəqəsində polis "Abzas Media" müstəqil xəbər saytının reportyoru Nərgiz Absalamovanı, "Amerikanın Səsi" yayım şirkətinin Azərbaycan xidmətinin müstəqil reportyoru Nigar Mübarizi və Facebook və TikTok-dakı hesablarında sosial məsələləri işıqlandıran reportyor Elsevər Muradzadəni kəndə buraxmaqdan imtina edib.

Jurnalistlərin sözlərinə görə, reportyorlar başqa yolla kəndə daxil olublar və iki nəfər formalı polis işçisinin və yeddi-səkkiz nəfər mülki geyimli şəxsin onları saxladığını və telefonlarını əllərindən aldığını bildiriblər.

Jurnalistlər zorakılıq tətbiq edilməklə kənddən çıxarılıblar, telefonları yalnız zorla rayon mərkəzinə aparıldıqdan sonra onlara qaytarılıb.

İyunun 22-də Dövlət Səfərbərlik və Hərbi Xidmətə Çağırış Xidmətinin əməkdaşları Elməddin Şamilzadəni Söyüdlüdə polis əməkdaşlarının üzləri görünən video yayımladıqdan sonra quruma dəvət ediblər.

Zabitlər hərbi xidmətdən azad olunmasının dəlilini tələb ediblər, baxmayaraq ki, o, 2022-ci ildə universitetdə təhsili ilə əlaqədar 4 il müddətinə möhlət götürüb. 

Növbəti gün Bakının Yasamal Rayon Polis Bölməsi Şamilzadəni saxlayıb və videonu silməyi tələb edib. Jurnalist imtina etdikdə üç polis ona fiziki təzyiq göstərib.

Şamilzadə deyib ki, təxminən beş dəqiqəlik huşunu itirib, oyandıqda isə videonu Facebook-dan silib.

İyunun 23-də Bakının Binəqədi Rayon Polis Bölməsi "Söyüdlü"nün baş redaktoru Ülvi Həsənlini Absalamov, Mübariz və Muradzadəni saxlayan iki polisin fotoşəklini Facebook-da yerləşdirdikdən sonra bölməyə dəvət edib.

Polis postu silməyi tələb edib, amma o, imtina edib və dörd saat sonra sərbəst buraxılıb.

Elə həmin axşam ABŞ-ın Bakıdakı səfirliyinin təhlükəsizlik xidmətinin əməkdaşları Söyüdlüdəki hadisələrlə əlaqədar diplomatik missiyada keçirilən mərasimdə üç Azərbaycanlı fəalın etirazını canlı yayımladıqdan sonra Həsənlini səfirlik ərazisindən çıxarıblar. 

Həsənli və fəallar səfirliyin ərazisindən kənarda saxlanılıblar və sonradan sərbəst buraxılıblar.

İyunun 25-də müstəqil "Toplum TV" telekanalının reportyoru Fərid İsmayılov Söyüdlü kəndinə qonşu olan Çovdar kəndinin sakinindən müsahibə götürərkən mülki geyimli iki şəxs ona yaxınlaşıb, özlərini polis kimi təqdim edib və yerli məmurların kənddən reportaj hazırlanmasını qadağan etdiyini bildirərək, onun kamerasını əlindən almağa çalışıb.

Yerli hakimiyyət onu videoreportajları dərc etsə, qohumlarını işdən qovmaqla təhdid edib.

JMK-nin Azərbaycan DİN-ə, Bakı Şəhər Polis İdarəsinə, habelə Yasamal, Binəqədi və Nəsimi rayon polis bölmələrinə elektron məktublarına cavab verilməyib.

ABŞ-ın Bakıdakı səfirliyinin nümayəndəsi JMK-nin elektron poçt vasitəsilə ünvanladığı Həsənlinin səfirlikdən kənarlaşdırılması barədə sorğusuna cavabda bildirib ki: "İyunun 23-də tədbirin yalnız rəsmi hissəsi KİV və çəkiliş üçün açıq idi" və ABŞ səfirliyi etiraz hüququ və söz azadlığı da daxil olmaqla, əsas azadlıqları dəstəkləyir". 06В