JMK COP29 nümayəndələrini Azərbaycanda həbs edilmiş jurnalistlərin azad edilməsini tələb etməyə çağırıb

Nyu-Yorkda yerləşən Jurnalistləri Müdafiə Komitəsi (JMK) Bakıda keçirilən COP29 sammitinə gələn nümayəndələri müstəqil media nümayəndələrinə qarşı repressiyalarla əlaqədar Azərbaycan hakimiyyətinə təzyiq göstərməyə çağırıb. 

"Ən az 15 jurnalist 8 ildən 20 ilədək həbs cəzası nəzərdə tutan ittihamlarla məhkəmə prosesini gözləyir. Azərbaycanın mətbuata qarşı münasibəti BMT-nin konfransını qəbul edən ölkədən gözlənilən insan hüquqları dəyərləri ilə bir araya sığmır", deyə JMK-nin Avropa və Mərkəzi Asiya üzrə proqram koordinatoru Gülnoza Said bildirib. 

"JMK Azərbaycan hakimiyyətini ədalətsiz olaraq həbs edilmiş bütün jurnalistləri azad etməyə və mətbuat azadlığını dəstəkləməyə, BMT-ni isə böyük tədbirlərin Azərbaycan kimi insan hüquqları və mətbuat azadlığı sahəsində vəziyyətin dəhşətli olduğu ölkələrdə keçirilməyəcəyinə zəmanət verməyə çağırır", deyə o, əlavə edib.

Noyabrın 6-da JMK və 16 digər beynəlxalq hüquq müdafiə təşkilatı Avropa İttifaqını ölkədə insan hüquqları sahəsində vəziyyətin pisləşməsi məsələsini birbaşa qaldırmağa çağırıb. Son bir ildə Azərbaycan hakimiyyəti ən az 15 jurnalistə qarşı işlərinə görə qisas olaraq ağır cinayətlər törətmək ittihamı irəli sürüb, onların 13-ü həbsdədir. Barmaqlıqlar arxasında olanların əksəriyyəti Azərbaycanda qalan son müstəqil KİV-lərdə işləyir və Qərb donorlarından vəsait alınması ehtimalı ilə bağlı valyuta qaçaqmalçılığı ittihamları ilə üzləşirlər, deyə JMK-nın bəyanatında qeyd edilir.