Jurnalistlərə hücumlar ATƏT-in diqqət mərkəzindədir

Bakı/09.04.19/Turan: Aprelin 12-də Vyanada "Jurnalistlərə hücum: KİV azadlığı üçün təhlükə" mövzusunda konfrans keçiriləcək. ATƏT-in KİV azadlığı üzrə nümayəndəsi tərəfindən təşkil edilən beynəlxalq konfransda jurnalistlərə qarşı zorakı əməllər və ya zorakılıq təhdidləri diqqət mərkəzində olacaq.

Təşkilatçıların sözlərinə görə, tədbirdə zorakılıqla üzləşən bir çox jurnalistlər və ya onların qohumları, o cümlədən qətlə yetirilmiş Maltalı jurnalist Dafna Karuana Qalitsiyanın oğlu və öldürülmüş Slovakiyalı jurnalist Yan Kuçyakın işlədiyi Aktuality.sk-nin baş redaktoru iştirak edəcək.

Konfrans jurnalistlərə təcrübə mübadiləsi və ATƏT-in iştirakçısı olan dövlətlərin ifadə etmək azadlığı hüququnu və kütləvi informasiya vasitələrini daha yaxşı qorumasının yolları haqqında müzakirələrdə iştirak üçün forum yaradacaq. ATƏT iştirakçısı olan dövlətlər 2018-ci il dekabrın 8-də Xarici İşlər Nazirləri Şurasının Milanda keçirilən iclasında jurnalistlərin təhlükəsizliyi haqqında əlamətdar qərar qəbul edib.

"Qərar №3/18 "Jurnalistlərin təhlükəsizliyi" adlanan sənəddə "siyasi liderlər, dövlət başçıları və bütün səviyyələrdə hakimiyyət jurnalistləri peşə fəaliyyətlərinə görə təhdidlərdən və qorxudulmadan və ya ədalətsiz hökmlərdən qorumaq, habelə bu cür təzahürləri qətiyyətlə pisləmək" çağırışı yer alır.

Sənəddə etiraf olunur ki, "jurnalistin işi onu və ailə üzvlərini zorakı əməllər təhlükəsinə məruz qoya bilər".

Nazirlər Şurası "jurnalistlərə qarşı cinayətlərin qarşısının alınması üçün səmərəli tədbirlər görməyə, bu əməllərin cəzasız qalmamasını təmin etməyə" çağırıb.

"Müstəqil KİV azad və açıq cəmiyyətin ən mühüm elementi və sağlam idarəetmə sisteminin göstəricisidir", deyə sənəddə bildirilir.

Qərar №3/18 "əsassız saxlanılmış jurnalistlərin dərhal azad edilməsini", həmçinin "KİV-in işinin qanunsuz müdaxilədən, o cümlədən yeni texnologiyalardan istifadə zamanı müdaxilədən qorunmasını" tələb edir.

XİN Şurasının iclasına sədrlik edən İtaliyanın xarici işlər naziri EntsoMoavero-Milanezi qeyd edib ki, bu sənədin razılaşdırılması və yekdilliklə dəstəklənməsi görüşün, demək olar ki, 30 il ərzində ilk mühüm nailiyyətidir.

Tədbirdə həmçinin KİV üzrə beynəlxalq ekspertlər, 30-dan çox ölkədən alim və siyasətçilər iştirak edəcəklər. Tədbirin əsas iştirakçıları arasında Metyu Karuana Qalitsiya - araşdırmaçı jurnalist və qətlə yetirilmiş Dafna Enn Karuana Qalitsiyanın oğlu (Malta); Piter Bardi - öldürülmüş jurnalist Yan Kuçyakın işlədiyi aktuality.sk saytın baş redaktoru (Slovakiya); Katya Qorçinskaya - jurnalist / media-menecer və öldürülmüş jurnalist Pavel Şeremetin dostu (Ukrayna); Svetlana Lukiç - Peščanik onlayn-portalın baş redaktoru (Serbiya); Elif Akgül - müstəqil jurnalist (Türkiyə); Lukpan Ahmedyarov - "Ural həftəsi" qəzetinin baş redaktoru (Qazaxıstan); Tatyana Felgenhauer - "Exo Moskvı" radiostansiyasının baş redaktor müavini və aparıcısı (Rusiya) var.

Müzakirələrin peşələri getdikcə daha çox təzyiqə məruz qaldığı bir vaxtda araşdırmaları necə davam etdirməsi, təhdidlərə və özünüsenzuraya qarşı necə mübarizə aparması, jurnalistlərin qətllərinə görə cəzasızlığın KİV azadlığına yaratdığı təhdidlər üzərində cəmləşəcəyi gözlənilir. -0-