Jurnalistləri Müdafiə Komitəsi Azərbaycan hakimiyyətini polisin jurnalistlərə qarşı yol verdiyi zorakılığı araşdırmağa çağırıb

Bakı/16.02.22/Turan: "Azərbaycan hakimiyyəti Bakıda keçirilən etiraz aksiyasını işıqlandırarkən saxlanılan üç jurnalistə qarşı polisin zorakılığı ilə bağlı iddiaları araşdırmalı və bütün mətbuat mənsublarının sərbəst işləməsinə icazə verməlidir". Bu barədə Jurnalistləri Müdafiə Komitəsinin məlumatında deyilir.

Sənəddə qeyd edilir ki, fevralın 15-də polis Azadlıq qəzetinin əməkdaşı Fatimə Mövlamlı, müstəqil internet nəşri olan Azel TV-nin əməkdaşı Sevinc Sadıqova və müstəqil YouTube kanalı olan Kanal1-in baş redaktoru Teymur Kərimovu saxlayıb. Onlar polis əməkdaşları tərəfindən zorakılığa məruz qalıblar.

"Azərbaycan hakimiyyəti jurnalistlər Fatimə Mövlamlı, Sevinc Sadıqova və Teymur Kərimovla polisin kobud rəftarına dair iddiaları tam araşdırmalı və belə hadisələrin təkrarlanmaması üçün etibarlı addımlar atmalıdır", deyə JMK-nin Avropa və Mərkəzi Asiya üzrə proqram koordinatoru Gülnoza Səid bildirib.

"Hökumətyönlü və tənqidi nəşrlərin jurnalistləri özbaşına həbsdən və polis zorakılığından qorxmadan nümayişləri işıqlandırmaqda azad olmalıdırlar", deyə o qeyd edib.

Polis əməkdaşları Kərimovu polis maşınına mindirərkən onun qolundan və dizindən vurublar, bu barədə JMK-yə o, özü bildirib. Zabitlər onu Bakı şəhər Səbail rayonu 9-cu polis bölməsinə aparıblar, yarım saat sonra ittiham irəli sürmədən sərbəst buraxıblar.

Mövlamlı və Sadıqova avtomobilə mindirilərkən və daha sonra bölmədə polisin təzyiqinə məruz qalıblar.

Polis bölməsində onları, polisin sözlərinə görə, mühafizə olunan obyekt olan administrasiyanın binasını çəkməkdə ittiham ediblər, deyə zərərçəkmiş jurnalistlər JMK-yə bildiriblər.

Amma, jurnalistlərin sözlərinə görə, onlar etirazçılar prezident administrasiyasından bir neçə küçə uzaqda olduğu zaman saxlanılıblar.

Polis əməkdaşları jurnalistlərin kadrları silməsini tələb ediblər, Mövlamlını iki dəfə yerə yıxıblar, dəfələrlə onun ayaqlarına və qarnına təpiklə vurublar. Zabitlər həmçinin Sadıqovanı və Mövlamlını dəfələrlə söyüb və təhqir ediblər, Mövlamlını "fahişə" adlandırıblar.

Azərbaycanda əməkdaşı olduğu "Azadlıq" nəşri 2017-ci ildən bağlalan Mövlamlı müntəzəm olaraq hakimiyyətin siyasi fəallara qarşı repressiyaları haqqında yazır və KİV-lərin məlumatına görə, 10 dəfədən çox saxlanılıb.

Polis həmçinin saxlanılan şəxslərə bildirib ki, onlar jurnalist kimi fəaliyyət göstərmək hüququna malik deyillər, belə ki, 2022-ci il fevralın 8-də qüvvəyə minən KİV haqqında yeni qanunla yaradılmasına qərar verilmiş jurnalistlərin mərkəzləşmiş reyestrinə daxil edilməyiblər.  

Polis Sadıqovanın mobil telefonlarından birini müsadirə edib və sonradan ona qaytarıb.

Sadıqovanın sözlərinə görə, polis əlavə telefonları müsadirə etmək üçün jurnalistləri soyunduraraq axtarış aparmağı əmr edib. Amma jurnalistlər etiraz ediblər və vəkillərinin çağırılmasını tələb ediblər, bundan sonra polis bundan imtina edib.

Daha sonra zabitlər Mövlamlını və Sadıqovanı Bakı şəhər Baş Polis İdarəsinə aparıblar, dörd saat sonra ittiham irəli sürmədən buradan sərbəst buraxıblar.

Hər üç jurnalist JMK-yə bildirib ki, polisin onlara qarşı rəftarından rəsmi şikayət verməyi planlaşdırırlar. JMK şərh almaq üçün elektron poçt vasitəsilə Azərbaycan DİN-ə müraciət edib, amma cavab almayıb.

JMK-nin araşdırmalarına görə, Sadıqova Azel.TV-nin təsisçisi və rəhbəri, həyat yoldaşı Əfqan Sadıqov həbs edildikdən sonra da bu nəşr üçün reportajlar çəkməyə davam edib. Əfqan Sadıqov hazırda tənqidi nəşrlərinin intiqamı olaraq dörd illik həbs cəzası çəkir. -16D06-