Kasprşik Ermənistan XİN başçısına Məmmədyarovla görüşün yekunları barədə məlumat verib

Bakı/18.05.18/Turan: Mayın 17-də Ermənistanın XİN başçısı Zoqrab Mnatsakanyan ATƏT-in fəaliyyətdə olan sədrinin şəxsi nümayəndəsi Andjey Kasprşiki qəbul edib.

XİN-in mətbuat xidmətinin məlumatına görə, Kasprşik Ermənistan XİN başçısına Azərbaycan xarici işlər naziri ilə Parisdə keçirdiyi görüşün nəticələrini təqdim edib.

Nazir Mnatsakanyan Ermənistanın Dağlıq Qarabağ münaqişəsinin müstəsna olaraq ATƏT-in Minsk Qrupu həmsədrliyi formatında sülh yolu ilə nizamlanmasına sadiq olduğunu təsdiq edib, bu kontekstdə daha əvvəl əldə olunmuş razılaşmaların həyata keçirilməsinin əhəmiyyətini qeyd edib.

Həmsöhbətlər ATƏT-in Minsk Qrupu həmsədrlərinin gələcək iş proqramına toxunublar.

Elə həmin gün Kasprşik Ermənistanın müdafiə naziri David Tonoyanla görüşüb.

Müdafiə Nazirliyinin mətbuat xidmətinin məlumatına görə, görüşdə David Tonoyan Kasprşikə Ermənistan-Azərbaycan dövlət sərhədində və Qarabağda təmas xəttində vəziyyət, habelə atəşkəs rejiminin pozulması tezliyi və xarakteri haqqında məlumat verib.

Xüsusən, David Tonoyan son günlər Azərbaycan qüvvələrinin fəallaşması, bunun nəticəsində Ermənistan hərbi qulluqçusu Şamxal Petrosyanın yaralanmasından narahat olduğunu bildirib. O, atəşkəs rejiminə ciddi şəkildə riayət olunmasının əhəmiyyətini qeyd edib. -02D-