Keçmiş nazir Nicat Quliyev azadlığa çıxıb

Qanunsuz silah saxlamaq ittihamı ilə üç il müddətinə həbs olunmuş Azərbaycanın keçmiş xarici iqtisadi əlaqələr naziri Nicat Quliyev cəza müddətinin başa çatması ilə əlaqədar bu gün azadlığa çıxıb.

Onun vəkili Əfqan Məmmədov xəbəri Turan-a təsdiq edib.

Onun sözlərinə görə, Quliyev ona qarşı irəli sürülən ittihamı qəti şəkildə rədd edirdi.

Qeyd edək ki, mayın sonlarında cəza müddətinin bitməsinə cəmi üç ay qalmasına baxmayaraq, Ali Məhkəmə onun barəsində hökmü yüngülləşdirib. Bundan əvvəl Quliyevi vaxtından əvvəl şərti azadlığa buraxmaqdan da imtina edirdilər. Onun xəstə atası ilə vidalaşmasına, daha sonra isə onun dəfnində iştirak etməsinə icazə verməyiblər.

Hüquq müdafiə təşkilatları Quliyevi siyasi məhbus kimi tanıyıb.

Quliyev 2014-cü il avqustun 8-də Novxanı qəsəbəsində saxlanılıb. İstintaq bildirib ki, onun bağında avtomatlar və əl qumbaraları, şəxsi avtomobilində isə tapança tapılıb.

Quliyevin həbsindən sonra məşhur kinodramaturq Rüstəm İbrahimbəyov bildirib ki, Quliyev 2013-cü il prezident seçkilərindən əvvəl İbrahimbəyova məsləhət verdiyinə görə təqib olunur. Dramaturq əmin idi ki, Quliyevi məhz ona göstərdiyi dəstəyə görə cəzalandırıblar.

1993-1995-ci illərdə Nicat Quliyev Azərbaycanın xarici iqtisadi əlaqələr naziri vəzifəsini tutub, sonradan isə ölkəni tərk edib. 90-cı illərin sonlarından 2000-ci illərin əvvəllərinə qədər o, Acarıstan prezidenti Aslan Abaşidzenin müşaviri kimi işləyib. Abaşidzenin istefasından sonra Quliyev Azərbaycan və Türkiyədə bizneslə məşğul olub. 2005-ci ilin oktyabrında Nicat Quliyev bir sıra digər yüksək vəzifəli şəxslərlə birlikdə dövlət çevrilişi hazırlamaq ittihamı ilə saxlanılıb, amma iki həftə sonra sərbəst buraxılıb. -06B—