Kriminal avtoritet Oleq Bakinski Azərbaycanda həbs edilib

Oleq Bakinski kimi tanınan ukraynalı kriminal avtoritet Oleq Krapivin Azərbaycanda həbs edilib. Yerli KİV bildirib ki,  o, Azərbaycan Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları tərəfindən. saxlanılıb

Nərimanov Rayon Məhkəməsinin qərarı ilə Krapivinin barəsində 3 ay müddətinə həbs qətimkan tədbiri seçilib. Ona qarşı irəli sürülən ittihamlar açıqlanmır.

Azərbaycan Daxili İşlər Nazirliyi Krapivinin həbsi barədə xəbərləri şərh etmir.

Əslən Azərbaycandan olan  Krapivin  əvvəllər sərbəst güləşçi olub, nüfuzlu beynəlxalq turnirlərin, o cümlədən Avropa birinciliyinin qalibi olub. Sonradan Ukraynaya köçüb, Ukrayna Azərbaycanlıları Konqresinin Kiyev təşkilatının işində fəal iştirak edib.

Lakin ən çox kriminal avtoritet kimi tanınıb.

"Tanınmış kriminal personaj Oleq Krapivin 90-cı illərdə Kiyevdə fəaliyyət göstərmiş "Avdışev" və "Juravley" mütəşəkkil cinayətkar qruplarının fəaliyyətilə əlaqələndirilir. Məsələn, 2019-cu ildə tanınmış hüquq müdafiəçisi Eduard Bağırovu kafedə görüşə dəvət edib. Oleq Krapivin əlaltıları ilə birlikdə hüquq müdafiəçisini döyüblər, pasportunu alıblar, xanımını və uşaqlarını öldürməklə hədələyiblər. 2022-ci ildə Kiyevdə Krapivin tələb olunan "haqqı" ödəmək istəməyən bir sahibkarı qorxutmaq üçün Lexus LX 570 avtomobilinə atəş açıb. Oleq "Bakinski" həm də qəsb, adam oğurluğu, sifarişli qətllər, Yanukoviç rejiminə və onun əlaltılarına xidmət etməklə tanınır", - ANTİKOR (Ukraynanın milli antikorrupsiya portalı) yazır.

2022-ci ilin aprelində Krapivin "xalqlar arasında dostluğun möhkəmləndirilməsində və Azərbaycan diasporunun inkişafında xidmətlərinə görə" "Dostluq" ordenilə təltif edilib.