KTMT-nin baş katibi Yuri Xaçaturova qarşı ittiham irəli sürülüb

Yerevan/27.07.18/Turan: KTMT-nin baş katibi Yuri Xaçaturova qarşı ittiham irəli sürülüb. Ermənistan KİV-i Xüsusi İstintaq Xidmətinin mətbuat xidmətinə istinadən bildirib ki, Y.Xaçaturovun 2008-ci il martın 1-2-də Yerevanda baş vermiş hadisələrdə əli var.

Həmin vaxt Ermənistan Silahlı Qüvvələri Baş Qərargah rəisi postunu tutan Y.Xaçaturov digər şəxslərlə əlbir olaraq konstitusiya quruluşunu devirməkdə ittiham olunub.

İstintaq Y.Xaçaturovun həbsi barədə vəsatəti məhkəməyə təqdim edib.

Qeyd edək ki, bundan öncə Ermənistanın o zamankı müdafiə naziri Mikael Arutyunyanın barəsində axtarış elan edilib. O, dinc nümayişçilərə qarşı ordudan istifadə etməkdə ittiham olunub.

Bu ittiham həm də ölkənin keçmiş prezidenti Rober Köçəryana qarşı irəli sürülüb.

Qeyd edək ki, Y.Xaçaturyan rotasiya hüququ ilə KTMT-nin baş katibidir və onun daimi iş yeri Minsk şəhərindədir. O, Yerevana istintaqa ifadə vermək üçün gedib.-02D-