Makron Əliyevə zəng edib

Bakı/24.12.22/Turan: Ötən gün Fransa prezidenti Emmanuel Makron prezident İlham Əliyevə zəng edib.

Azərbaycan prezidentinin mətbuat xidmətinin məlumatına görə, söhbət zamanı Makron Ermənistanla Azərbaycan arasında münasibətlərə, eləcə də Laçın yolundakı vəziyyətə toxunub.

Əliyev qeyd edib ki, Azərbaycan vətəndaş cəmiyyətinin nümayəndələri Qarabağda faydalı qazıntı yataqlarının qanunsuz istismarına və ətraf mühitə dəyən ziyana etiraz edirlər. O vurğulayıb ki, erməni sakinlərin bu yoldan mülki və humanitar məqsədlər üçün istifadə etməsinə heç bir maneə yoxdur, Qırmızı Xaç xəttilə tibbi maşınların keçidi təmin edilir.

Əliyev qeyd edib ki, Azərbaycan tərəfinin əsas tələbi yataqların qanunsuz istismarına son qoyulması və ərazidə ekoloji monitorinqin aparılmasıdır.

Söhbət zamanı Əliyev Ermənistanın hələ də Azərbaycana məxsus 8 kəndi işğal altında saxlamasına diqqəti çəkib. Bunlar 90-cı illərin əvvəllərində ermənilərin zəbt etdikləri Naxçıvan Muxtar Respublikasının Kərki kəndi və Qazax rayonunun yeddi kəndidir.

Makron Fransanın Ermənistanla Azərbaycan arasında münasibətlərin normallaşmasına və sülh sazişi üzrə danışıqların davam etdirilməsinə dəstək verməyə hazır olduğunu bildirib.  

Fransanın vasitəçi olmağa hazır olmasını şərh edən Əliyev “balanslı və qərəzsiz davranış”ın zəruriliyini xatırladıb, “Frankofoniya” və bir sıra digər beynəlxalq təşkilatlar çərçivəsində Azərbaycan əleyhinə fəaliyyəti xatırladıb, Azərbaycan prezidentinin mətbuat xidməti bildirib.

Öz növbəsində, Yelisey sarayının məlumatında ​​qeyd olunur ki, telefon danışığı zamanı Makron “Cənubi Qafqazda gərginliyin yenidən artmasından dərin narahatlığını” ifadə edib.

O 9 noyabr 2020-ci il tarixli atəşkəs razılaşmasına əməl etməyə və “Laçın dəhlizi boyunca sərbəst hərəkətə icazə verməyə” çağırıb. Makron həmçinin humanitar təşkilatların və Birləşmiş Millətlər Təşkilatı müəssisələrinin zərər çəkmiş əhaliyə maneəsiz çıxışının təcili təmin edilməsinin zəruriliyindən danışıb. Prezident Əliyev isə öz növbəsində bildirib ki. “dəhliz boyu sərbəst hərəkəti təmin etmək niyyətindədir”.

“Faydalı qazıntıların qeyri-qanuni istismarı ilə bağlı Azərbaycanın narahatlığına gəlincə, hər iki prezident mövcud standartlara əməl olunmasının vacibliyini qeyd ediblər”, - Yelisey Sarayının məlumatında deyilir.

İki prezident regionda davamlı siyasi həllin tapılması üçün əlaqədar tərəflərlə danışıqları davam etdirməyə razılaşıblar və yaxın həftələrdə yenidən telefonla danışmaq niyyətində olduqlarını bildiriblər, - Fransa prezidentinin mətbuat xidmətinin məlumatında  deyilir. —06B-