Media nümayəndələri yenidən “Media haqqında” qanun layihəsini açıq müzakirə etməyə çağırıblar

Bakı/09.07.21/Turan: Cümə axşamı ifadə azadlığı sahəsində hüquqşünas Ələsgər Məmmədli, Turan İnformasiya Agentliyinin direktoru Mehman Əliyev və Media İnkişaf Agentliyinin icraçı direktoru Əhməd İsmayılovun görüşündə media haqqında qanunun hazırlanması ilə bağlı məsələlər, habelə kütləvi informasiya vasitələri, cəmiyyət və dövlət arasında qarşılıqlı münasibətlər diqqət mərkəzində olub.

İsmayılov KİV haqqında qanunun yenilənməsi zərurətini diktə edən şərtləri, yeni qanunun mahiyyəti informasiya sahəsində qarışıq vəziyyəti nizamlamaq, sui-istifadələri aradan qaldırmaq, media mühitini sağlamlaşdırmaq, media qurumlarının dayanıqlılığını təmin etmək zərurətindən ibarət olan məqsəd və vəzifələrini açıqlayıb.

Məmmədli və Əliyev layihə ilə tanış deyillər, buna görə müzakirələr ümumi xarakter daşıyıb – iqtisadi və peşəkarlıq baxımından dərin böhran içərisində olan KİV-in əsas problemlərini əhatə edib. İnformasiya cəmiyyətinin inkişaf perspektivlərinə də toxunulub.

Media üzrə ekspertlər dövlət siyasətinin söz azadlığının boğulmasına yönəldiyi bir şəraitdə qanun layihəsinin müzakirələrinin qapalı keçirilməsindən narahatlıqlarını bildiriblər.

Öz növbəsində, İsmayılov bildirib ki, qapalı müzakirələrdən sonra qanun layihəsi parlamentə təqdim ediləcək, daha sonra isə ictimaiyyətin mühakiməsinə çıxarıla bilər.

Qeyd edək ki, qanunvericiliyə təklif edilən dəyişikliklər media sahəsində məhdudiyyətləri və bu sahəyə nəzarəti nəzərdə tutur, bu da ictimaiyyət arasında narahatlıq doğurur. -0