Medianın İnkişafı Agentliyi regionlarda həyata keçiriləcək tədbirlərə 160 min manat xərcləyəcək

Bakı/01.11.22/Turan: Medianın İnkişafı Agentliyi açıq tenderin qalibi olan "VEGA TRAVEL MANAGEMENT" Məhdud Məsuliyyətli Cəmiyyəti ilə ümumi dəyəri 160 min manat olan iki xidmət müqaviləsi bağlayıb.

https://etender.gov.az/ dövlət satınalmaları saytında yer alan məlumata görə, "Media sahəsinin inkişafı prosesində gənclərin fəal iştirakının təmin edilməsi, onların bu sahəyə dair biliklərə yiyələnməsi, həmçinin dövlətçilik ənənələri və vətənpərvərlik ruhunda yetişməsi, sosial məsuliyyət hissinin gücləndirilməsi istiqamətində təşkil ediləcək tədbirləri" layihəsinin həyata keçirilməsi üçün 93 695 məbləğində satınalma müqaviləsi bağlanılıb.

"Regional media subyektlərinin inkişafı, region mediasının nümayəndələri ilə qarşılıqlı əlaqələrin qurulması, onların bu sahədə müşahidə olunan müasir tendensiyalar və innovativ həll yolları ilə tanış edilməsi, habelə işğaldan azad olunmuş ərazilərlə bağlı həqiqətlərin işıqlandırılması və ictimaiyyətə çatdırılması məqsədilə təşkil ediləcək silsilə tədbirlər" layihəsi ilə bağlı 67 889.88 manat məbləğində satınalma müqaviləsi bağlanılıb. 

Layihələrdə ölkənin regionlarında beşulduzlu otellərdə tədbirlərin həyata keçirilməsi, habelə azad olunan ərazilərə səfərlər nəzərdə tutulur.

"VEGA TRAVEL MANAGEMENT" MMC-nin saytında yer alan məlumata görə, şirkət 2019-cu ildə yaradılıb. Ticari Hüquqi Şəxslərin Dövlət Reyestrindəki məlumatlara görə, şirkətin nizamnamə kapitalı 10 manat təşkil edir.

Media sahəsində ekspert, "Azadlıq" qəzetinin redaktoru Rövşən Hacıbəyli qeyd edilən layihələrin səmərəli olacağına şübhə ilə yanaşıb.

"Maraqlıdır, bu tədbirlər hansı regional media qurumları üçün keçiriləcək? Regionlarda müstəqil nəşr qalmayıb. Sonuncu çap nəşrləri Masallıda "Cənub xəbərləri" və Mingəçevirdə "Mingəçevir işıqları" idi, amma onlar çoxdan elektron formata keçib. Bu vəziyyətdə regionlarda bu cür layihələr formallıq, regionlarda mətbuatın dəstəklənməsi üzrə iş görüntüsü yaratmaqdır.

Medianın İnkişafı Agentliyi faktiki olaraq öz sələfiniin - KİV-ə Dövlət Dəstəyi Fondunun iş üslubunu təkrar edir. Buna görə dövlət vəsaitlərindən istifadənin səmərəliliyindən danışmağa dəyməz", deyə Hacıbəyli bildirib. 06B