Medianın İnkişafı Agentliyi veb-saytlara və qəzetlərə maliyyə ayırıb

Bakı/01.07.21/Turan: Azərbaycan Respublikasının Medianın İnkişafı Agentliyi müsabiqənin qalibləri açıqlayıb. 

Medianın İnkişafı Agentliyinin məlumatına görə, otuzdan çox veb-sayt müsabiqənin qalibi olub.

Müsabiqə onlayn media subyektlərinin (veb-saytların) inkişafı, iqtisadi müstəqilliyinin gücləndirilməsi, fəaliyyətinin təkmilləşdirilməsi, habelə dövlət və cəmiyyət üçün əhəmiyyət kəsb edən layihələrin həyata keçirilməsi məqsədilə təşkil edilib  Agentlik tərəfindən maliyyələşdirilən onlayn veb-saytların hər birinə aylıq 3000 manat məbləğində maliyyə yardımı göstəriləcək. Maliyyə yardımı göstərilən dövr ərzində onlayn media subyektinin müvafiq sayda işçilərinin hər birinin əməkhaqqının minimum məbləği 600 manat təşkil etməli, maliyyə yardımının digər hissəsi isə veb-saytın infrastrukturunun gücləndirilməsi, dil imkanlarının genişləndirilməsi, təhlükəsizliyinin təmin edilməsi və rəqəmsal keyfiyyətinin artırılmasına yönəldilməlidir.

Maliyyə yardımının göstərilməsinə dair müqavilə imzalamış onlayn media subyekti (veb-sayt) həmin müqavilənin qüvvədə olduğu müddət ərzində hər ayın sonu müvafiq maliyyə vəsaitinin hansı istiqamətlərə xərcləndiyini təsdiq edən sənədləri Agentliyə təqdim etməlidir.

Bununla yanaşı, iyulun 1-də Medianın İnkişafı Agentliyi veb-saytları ilə yanaşı çap mediası subyektləri üçün təşkil olunan müsabiqənin qaliblərini açıqlayıb.

Medianın İnkişafı Agentliyinin xəbərinə görə, müsabiqə çap medianın inkişafı, iqtisadi müstəqilliyinin gücləndirilməsi, fəaliyyətinin təkmilləşdirilməsi, habelə dövlət və cəmiyyət üçün əhəmiyyət kəsb edən layihələrin həyata keçirilməsi məqsədilə təşkil olunub.

Çap mediasına dəstək layihəsinin qalibləri olan 18 qəzetin adı ealn olunub.

Müsabiqənin şərtlərinə görə həftədə bir nömrəsi maliyyələşdirilən qəzetlərin hər birinə aylıq 5000 manat, həftədə beş nömrəsi maliyyələşdirilən qəzetlərin hər birinə isə aylıq 15000 min manat məbləğində maliyyə yardımı göstəriləcək.

"Müsabiqədə qalib elan olunan hər bir qəzet redaksiyasının eyniadlı veb-saytına 3000 manat məbləğində maliyyə yardımı göstərilir. Qalib elan olunan qəzetin baş redaktoru müsabiqəyə müraciət ərizəsində qəzetinin eyniadlı veb-saytını əsaslı yeniləmək niyyətini ifadə etmişdirsə, maliyyə yardımı göstərilən 6 aylıq dövrün birinci ayında ona həmin veb-saytın əsaslı yenilənməsi məqsədilə 5000 manat məbləğində vəsait ayrılır". 

Müsabiqənin qalibləri maliyyə yardımı göstərilən dövr ərzində qəzetin eyniadlı veb-saytının işçilərinin hər birinin əməkhaqqının minimum məbləği 600 manat təşkil etməli, maliyyə yardımının digər hissəsi isə vebsaytın infrastrukturunun gücləndirilməsi, dil imkanlarının genişləndirilməsi, təhlükəsizliyinin təmin edilməsi və rəqəmsal keyfiyyətinin artırılmasına yönəldilməlidir.

"Maliyyə yardımı göstərilən ay üzrə qəzetin yalnız fiziki şəxslərdən ibarət hər əlavə 500 abunəsi üçün aylıq 200 manat, hər əlavə 1000 abunəsi üçün isə aylıq 400 manat məbləğində bonusun verilməsi nəzərdə tutulur".

Xatırladaq ki, maliyyə yardımı göstəriləcək veb-saytalrın və qəzetlərin böyülk əksəriyyəti iqtidayönümül nəşrlər hesab olunur. -0-