Məktəb müəllimləri seçkilərə "səfərbər edilib"?

Bakı/05.02.20/Turan: Müxtəlif seçki dairələrindən qeyri-rəsmi mənbələr məktəb işçilərinin seçki prosesinə cəlb edildiyini bildirirlər.

Belə ki, Sumqayıtdakı 31 nömrəli məktəbin müəllimlərinin və şagirdlərin valideynlərinin seçkilər günü "səfərbər edildiyi" iddia olunur.

"Valideynlər buraxılan parlamentdə deputat olmuş namizədlə görüşə çağırılırlar. Bununla yanaşı, məktəbin müəllimləri bəzi şagirdlərə yazırlar ki, valideynin seçkilərdə "onbaşı" qoyulub, yəni, seçki günü bir neçə məntəqədə səs verəcək 10 nəfərlik qrupa başçılıq edəcək", deyə mənbə anonim qalmaq şərtilə Turan-ın müxbirinə bildirib.

Turan-ın müxbirinin bu məktəbdən şərh almaq cəhdinə cavab olaraq telefonda özünü məktəbin direktor müavini kimi təqdim edən şəxs heç bir məlumat verməyəcəyini və bu cür suallara cavab verməyəcəyini bildirib.

Bakının Sabunçu rayonunda yerləşən  311 nömrəli tam orta məktəbin rəhbərliyi məktəbdə oxuyan şagirdin Lerik rayonunda qeydiyyatda olan valideynlərinə seçkiyə gəlməklə bağlı bildiriş göndərib. "Məktəb rəhbərliyi həm də 27 saylı Sabunçu ikinci seçki dairəsinin 2 saylı məntəqəyə rəhbərlik edir. Həmin məntəqədən bildiriş göndəriblər. Heç onu da düzgün yazmayıblar. Bildirişə 4-cü sinif şagirdinin adını-soyadını yazıb özünə veriblər ki, apar evə, valideynlərinə de ki, fevralın 9-da gəlib məktəbdə səs versinlər", deyə mənbə bildirib.

311 nömrəli tam orta məktəbin direktoru Esmira Muradova isə Turan-a bildirib ki, bildirişlərin bəziləri səhvən seçki dairəsində qeydiyyatda olmayan vətəndaşların adına yazılıb. "Məktəbin müəlliməsinə tapşırılıb ki, qeydiyyatda olan vətəndaşların adına bildiriş yazsın. O da qeydiyyat ünvanına baxmayıb və heç bir niyyət güdmədən bəzi bildirişləri səhv yazıb göndərib. Mən bu barədə bilən kimi bütün bildirişləri yığıb mənə təhvil vermək tapşırığı verdim".

Məsələ ilə bağlı 27 saylı Sabunçu ikinci seçki dairəsindən Turan-a bildirilib ki, məlumat yoxlanılacaq və araşdırıldıqdan sonra nəticələr barədə məlumat veriləcək. 

Oxşar hadisənin Xırdalan şəhərində 10 nömrəli tam orta məktəbdə də baş verdiyi bildirilir. Məlumata görə, şagirdin valideynlərinin qeydiyyat ünvanı Naxçıvan şəhəri olmasına baxmayaraq, məktəbdə səs vermələrinə israr edirlər.

Məsələ ilə bağlı Təhsil Nazirliyindən və Mərkəzi Seçki Komissiyasından münasibət öyrənmək mümkün olmayıb. -06D-