Milli Məclisdə Belçikanın xarici işlər nazirilə görüş olub

Bakı/25.08.23/Turan: Cümə günü Milli Məclisin spikeri Sahibə Qafarova Bakıda səfərdə olan Belçikanın xarici işlər naziri Haca Labib ilə görüşüb.

Milli Məclisin mətbuat xidməti bildirib ki, Qafarova erməni işğalından azad edilmiş ərazilərin bərpası və azərbaycanlı qaçqınların oraya qayıtması prosesi barədə məlumat verib.

O, Laçın yolundakı vəziyyətə toxunub, Ermənistanı və onu dəstəkləyən Qərb ölkələri beynəlxalq ictimaiyyətə yanlış məlumat verməkdə və real vəziyyəti təhrif etməkdə ittiham edib.

Qarabağda yaşayan erməni sakinlərin Azərbaycan vətəndaşları olduğunu bildirən Sahibə Qafarova xatırladıb ki, Bakı onların Azərbaycan cəmiyyətinə reinteqrasiyası üçün lazımi addımları təklif edir.

Qafarova son 3 ildə Belçika parlamentində Azərbaycana qarşı qəbul edilmiş 5 birtərəfli və qərəzli qətnaməni tənqid edib.

Öz növbəsində, Haca Labib regiona səfərinin məqsədi barədə məlumat verərək qarşılıqlı səfərlərin vacibliyini qeyd edib. O, regionda sülhün və təhlükəsizliyin təmin edilməsinin, o cümlədən ərazilərin minalardan təmizlənməsinin vacibliyini vurğulayıb. Onun sözlərinə görə, Belçika sülhə yardım etmək istəyir. 0