Monserrat Kabalye Azərbaycanda arzuolunmaz şəxs elan edilib

 İspaniyanın opera müğənnisi Monserrat Kabalye Azərbaycanda persona non qrata elan edilib, deyə “İnterfax” ölkənin İspaniyadakı səfirliyinə istinadən bildirir.

Bu qərara səbəb müğənninin 4 iyunda Dağlıq Qarabağa səfəridir.

«Biz vəziyyəti izah edərək İspaniya tərəfinə etiraz notası təqdim etdik və Monserrat Kabalyenin Azərbaycanın işğal edilmiş ərazilərinə qanunsuz səfəri ilə əlaqədar izahat tələb etdik. Notada bildirilir ki, Monserrat Kabalye arzuolunmaz şəxs elan edildiyinə görə Azərbaycan vizası əldə etməyəcək”, - deyə Azərbaycanın İspaniyadakı səfirliyi məlumat verib.

Bundan başqa, səfirlikdə dəqiqləşdiriblər ki, səfirliyin əməkdaşları hələ mayda müğənnisinin menecerləri ilə əlaqə saxlayaraq onun Qarabağa səfərinin mümkün nəticələrini diqqətə çatdırıblar. Kabalyenin təmsilçiləri inandırıblar ki, Qarabağda konsert olmayacaq.

Buna baxmayaraq, Kabalye iyunun 4-də Yerevandan Dağlıq Qarabağa gəlib. Səfər zamanı müğənni tanınmamış respublikanın rəhbərləri və onun prezidenti Bako Sərkisyanla görüşüb.—0—