Moskvada Putinlə Paşinyanın görüşü keçirilir

Moskva/07.04.21/Turan:  Aprelin 7-də günün ikinci yarısında Moskvada Rusiya prezidenti Vladimir Putin ilə Ermənistanın baş naziri Nikol Paşinyanın görüşü başlayıb.

Putin görüşü açaraq bildirib ki, Dağlıq Qarabağda vəziyyətin normallaşması ən aktual və kəskin problem olaraq qalır.

"Şübhəsiz, ikitərəfli münasibətlərin qurulması baxımından da danışmağa sözümüz var və əlbəttə ki, ən aktual, ən kəskin problemlər həm Dağlıq Qarabağda, həm də onun ətrafında vəziyyətin normallaşmasıdır", -  Putin bildirib.

Öz növbəsində Paşinyan Dağlıq Qarabağda Rusiya sülhməramlılarının olmasının vacibliyini qeyd edib ki. “Bu regionda sabitlik və təhlükəsizliyin vacib amilinə çevrilir", - o deyib.

O, "Dağlıq Qarabağda və bütövlükdə regionda təhlükəsizlik sisteminin arxitekturası"nın müzakirəsinə tərəfdar olduğunu bildirib.

Sonra  hərbi əsirlər mövzusuna toxunub: "Bu məsələ hələ də həllini tapmayan çox vacib məsələdir”.

“Dəfələrlə müzakirə etdiyimiz kimi, 9 noyabr (2020-ci il) bəyanatına əsasən bütün girovlar, hərbi əsirlər, digər tutulan şəxslər vətənə qaytarılmalıdır. Lakin təəssüf ki, indiyədək Azərbaycanda saxlanılan şəxslərimiz var", - Paşinyan deyib və əlavə edib ki, bu məsələ ilə bağlı Yerevan və Moskvanın mövqeyi eynidir. -0-