Paşinyan Putinlə əsirlərin qaytarılması işinin intensivləşdirilməsi haqqında razılıq əldə edib

Bakı/08.04.21/Turan: Ermənistan baş naziri Nikol Paşinyan Rusiya Federasiyasının prezidenti ilə görüşdə əsirlərin qaytarılması üzrə daha intensiv iş həyata keçirilməsi barədə razılıq əldə edib. Armenpress-in məlumatına görə, bu barədə Paşinyan Moskvada erməni hüquqşünaslar assosiasiyasının onlarla üzvü ilə görüşdə bildirib. 

Görüşdə əsirlərin qaytarılması haqqında suala cavabda baş nazir 2020-ci il 9 noyabr tarixli üçtərəfli bəyanatın "hərbi əsirlərin, girovların və digər saxlanılan şəxslərin və həlak olanların cəsədlərinin dəyişdirilməsini" nəzərdə tutan 8-ci bəndinin tam yerinə yetirilməsi zərurətini qeyd edib. 

Hökumət başçısı bildirib ki, əsirlərin qaytarılmasının təmin edilməsi məsələsində Rusiya Federasiyasının prezidenti Vladimir Putinlə tam qarşılıqlı anlaşma mövcuddur və bu mənada bu razılaşmanın tam yerinə yetirilməsi ilə bağlı mövqeləri üst-üstə düşür. Nikol Paşinyanın sözlərinə görə, Rusiya Federasiyasının prezidenti ilə əsirlərin qaytarılması üzrə daha intensiv iş aparılması barədə razılıq əldə olunub. -0-