MSK sistemi "çöküb"?

Bakı/09.02.20/Turan: Səsvermənin başa çatmasından təxminən 5 saat ötməsinə baxmayaraq, MSK dairələr üzrə seçkilərin ilkin nəticələrini elan etmir. Azərbaycanda keçirilən seçkilərdə indiyədək belə bir hal olmamışdı.

Hakim Yeni Azərbaycan Partiyası da seçkilərdən sonra ənənəvi mətbuat konfransını təxirə salıb. Jurnalistlər saat 21.30-da mətbuat konfransına dəvət olunmuşdular. Amma onları bir saata yaxın gözlətdikdən sonra "dairələrdən səlahiyyətli nümayəndələr gəlmədiklərinə görə" mətbuat konfransının baş tutmayacağını elan ediblər.

Bu, qəribə açıqlamadır, belə ki, məlumat ötürülməsi üçün səlahiyyətli nümayəndələrin fiziki iştirakına ehtiyac yoxdur.

Bu fonda bir sıra deputatlığa namizədlər saxtalaşdırma halları haqqında məlumat veriblər.

Belə ki, 31 saylı Suraxanı ikinci seçki dairəsində bloger Mehman Hüseynov səslərin əksəriyyətini qazanmasına baxmayaraq, ümumi yekuna görə o, sondan ikincidir. Bu barədə onun qardaşı, hüquq müdafiəçisi Emin Hüseynov bildirib.

"Bizdə 10 məntəqədə Mehmanın qələbəsini göstərən videodəlil və məntəqələrin yarısından çoxunun protokolu var. Mehman dairə üzrə böyük fərqlə qələbə qazanır. Amma hazırda saxtalaşdırma aparılır. İştirakın süni şəkildə artırılması ilə onun rəqiblərinə əlavə səslər yazılır. Dairədə cinayət törədilir və biz bunu sübut edəcəyik", deyə Emin Hüseynov bildirib. -06В-