Müdafiə naziri erməni tərəfin təxribatlarının qarşısının qətiyyətlə alınması barədə əmr verib

Bakı/31.05.21/Turan: Mayın 31-də Azərbaycanın müdafiə naziri Zakir Həsənov
nazir müavinləri, qoşun növləri komandanları, nazirliyin baş idarə, idarə və xidmət rəislərinin iştirakı ilə xidməti müşavirə keçirib. Həmçinin azad edilmiş ərazilərdə yerləşən birlik və birləşmə komandirləri, o cümlədən digər məsul zabitlər də videobağlantı vasitəsilə müşavirəyə qatılıblar. Bu barədə Müdafiə Nazirliyinin mətbuat xidmətinin məlumatında deyilir.

Zakir Həsənov son günlər Ermənistan-Azərbaycan dövlət sərhəddinin Kəlbəcər və Laçın rayonları sahəsində Ermənistan Silahlı Qüvvələrinin təxribatları nəticəsində yaranmış vəziyyəti təhlil edib, ölkə prezidentinin tapşırıqlarını və  qarşıya qoyduğu vəzifələri müşavirə iştirakçılarının diqqətinə çatdırıb.

Müdafiə naziri düşmənin təxribatlarının qarşısının alınması üçün azad edilmiş ərazilərdə yerləşən hərbi hissələrin komandanlığına qətiyyətli addımların atılması və çevik tədbirlərin görülməsini tapşırıb, məlumatda deyilir.-02D-