Müdafiə naziri Türkiyə Müdafiə Sənayesi Komitəsinin nümayəndə heyətini qəbul edib

Bakı/02.04.21/Turan: Cümə axşamı Azərbaycanın müdafiə naziri Zakir Həsənov Müdafiə Sənayesi Komitəsinin sədr müavini Mustafa Murat Şekerin rəhbərlik etdiyi nümayəndə heyətini qəbul edib.

Müdafiə Nazirliyinin məlumatına görə, Türkiyə Müdafiə Sənayesi Komitəsi, Hərbi Hava Qüvvələri, “ASELSAN” və “HAVELSAN” şirkətlərinin rəhbər heyətini salamlayan müdafiə naziri ikitərəfli hərbi-texniki əməkdaşlığın inkişaf etdirilməsinin vacibliyini vurğulayıb.

Nazir bildirib ki, Türkiyə müdafiə sənayesi şirkətlərinin istehsal etdiyi silah və döyüş texnikası, həmçinin hərbi təyinatlı digər məhsullar Azərbaycan ordusunun döyüş qabiliyyətini əhəmiyyətli dərəcədə artırıb. “Həmin döyüş vasitələrinin Vətən müharibəsində effektiv tətbiqi nəticəsində düşmənə ciddi zərbə vurulub”, deyə nazir qeyd edib.
Həsənov bu cür görüşlərin hərbi-texniki əməkdaşlığımızın genişləndirilməsi baxımından vacibliyini xüsusi vurğulayıb.

Görüşdə Türkiyə nümayəndə heyəti və Müdafiə Nazirliyinin rəhbərliyi Azərbaycan silahlı qüvvələrinin ən müasir elektron texnologiyalar ilə təchiz edilməsi, rabitə sistemləri imkanlarının genişləndirilməsi, eləcə də mövcud əməkdaşlığın hazırkı vəziyyəti, inkişaf perspektivləri və qarşılıqlı maraq doğuran digər məsələləri müzakirə ediblər. -02D-