Müdafiə Nazirliyi erməni hərbçilərin Ermənistanda saxlandığını təkzib edir (yenilənib)

Bakı/27.05.21/Turan: Azərbaycan Müdafiə Nazirliyi bu gün erməni təxribatçıların saxlandığı yerin koordinatlarını açıqlayıb.

Hərbi idarənin təkrar məlumatında deyilir ki, iki təxribat qrupu Kəlbəcər ərazisində dövlət sərhəddini keçib - biri 9, digəri 15 hərbi qulluqçudan ibarət olub.

Azərbaycan Silahlı Qüvvələrinin postlarına gedən yolları minalamağa cəhd edərkən nnların hərəkəti nəzarət altına götürülüb və hər iki qrupa qarşı tədbirlər görülüb.

Nəticədə 6 hərbi qulluqçu – ilk kəşfiyyat-təxribat qrupundan dörd nəfər, digər qrupdan isə bir zabit və iki hərbi qulluqçu saxlanılıb və tərksilah edilib.

Saxlanmanın baş verdiyi ərazinin coğrafi koordinatları: 40 dərəcə 09 dəqiqə 06 saniyə şimal enliyi, 45 dərəcə 58 dəqiqə 07 saniyə şərq uzunluğu (N 40°09′06″; E 45°58′07″).

Təxribatçı qrupların digər üzvləri Ermənistana qaça biliblər, məlumatda bildirilir. -02D-

*   *   *

2021 May 27 (Cümə axşamı) 12:17:40

Müdafiə Nazirliyi: Ötən gecə Kəlbəcərdə altı erməni hərbçi əsir götürülüb

Bakı/27.05.21/Turan:  Mayın 27-də gecə saat 3-ə yaxın Ermənistan Silahlı Qüvvələrinin kəşfiyyat-təxribat qrupu Kəlbəcər rayonunun Yuxarı Ayrım kəndi istiqamətində Azərbaycan ərazisinə keçməyə cəhd edib. Bu barədə Müdafiə Nazirliyinin məlumatında deyilir.

Azərbaycan ordusunun sərhəddə yerləşən mövqelərinə gedən təminat yolunu  minalamağa cəhd edən 6 erməni hərbi qulluqçu əməliyyat tədbirləri nəticəsində  mühasirəyə alınaraq zərərsizləşdirilib və əsir götürülüb.

Bu gün səhər sərhəd yaxınlığında tanklar da daxil olmaqla, düşmənin bir neçə döyüş texnikasının cəmləşməsi müşahidə edilib. Görülən tədbirlər nəticəsində onların gediş-gəlişinin qarşısı alınıb.

Öz növbəsində erməni tərəfi 6 erməni hərbçinin əsir götürüldüyünü təsdiqləyib, ancaq "təxribat hücumu" faktını təkzib edib. Ermənistan Müdafiə Nazirliyi bildirir ki, ermənilər Azərbaycanla sərhəddə Ermənistan ərazisində Geqarkunik vilayətində mühəndis işləri apararkən əsir götürülüblər.

Əsir düşmüş hərbi qulluqçuların qaytarılması üçün zəruri tədbirlər görülür, qurum bildirib.

Xatırladaq ki, Azərbaycanda ən azı 60 erməni əsgər əsirlikdədir. Onlar dekabrda barışıq əldə edildikdən bir ay sonra Qarabağda (Hadrut) saxlanılıblar və təxribatçı fəaliyyətdə ittiham olunurlar. -02D-