Müdafiə Nazirliyi sosial şəbəkələrdə yayılan tənqidi çarxlara reaksiya verib

Bakı/23.12.20/Turan: Ölkənin müdafiə nazirinin əmri ilə mütəxəssislərdən ibarət bir neçə komissiya işğal altında olmuş ərazilrdə yerləşdirilən hərbi birliklərdə şəxsi heyətin yerləşməsi və məişət şəraitinin yoxlanılmasını həyata keçirib.  Kompleks yoxlamalar nəticəsində ümumilikdə təminat məsələlərində sistemli problemlər aşkar edilməyib.  Bununla belə, bəzi cüzi nöqsanlar müəyyən edilib və aşkar olunan bu çatışmazlıqlar dərhal aradan qaldırılıb.  Vəzifələrinin icrasına səhlənkar yanaşan, nöqsanlara yol verən bəzi vəzifəli şəxslər cəzalandırılıb və onlar barəsində müvafiq tədbirlər görülüb. Bu barədə Azərbaycan Müdafiə Nazirliyinin mətbuat xidmətinin məlumatında deyilir. 

Son günlər sosial şəbəkələrdə Azərbaycan SQ-nin nüfuzuna xələl gətirən, Vətən Müharibəsində qələbəyə kölgə salan videokadrlar yayılır. Bu zaman "Dövlət sirri haqqında" qanunun müvafiq tələbləri pozulur, deyə məlumatda bildirilir.

Müdafiə Nazirliyi hərbi qulluqçuların valideynləri və yaxınlarına müraciət edərək bir daha bildirir ki, onları narahat edən məsələlərlə bağlı müraciətlərini sosial şəbəkələr vasitəsilə deyil, daha operativ həll olunması üçün nazirliyin sutka ərzində fasiləsiz fəaliyyət göstərən (012) 912, (012) 538-61-31, (012) 404-76-34 telefon nömrələri vasitəsilə bildirsinlər. -0-