Müdafiə Nazirliyinin Xankəndində sıra düzülüşü haqqında məlumatı və Njdenin abidəsi

Bakı/08.05.21/Turan:  9 May – Qələbə Günü münasibətilə Azərbaycan Müdafiə Nazirliyinin hərbi hissələrində müxtəlif tədbirlər keçiriləcək, Rusiya sülhməramlılarının isə Xankəndində təntənəli sıra düzülüşü planlaşdırılır. Bu barədə Azərbaycan Müdafiə Nazirliyinin məlumatında deyilir.

Türkiyə - Rusiya Birgə Monitorinq Mərkəzində xidmət göstərən bir qrup hərbiçi Müdafiə Nazirliyinin təşkilatçılığı ilə Beyləqan rayonunda İkinci Dünya müharibəsində iştirak etmiş və həlak olmuş şəxslərin xatirəsinə ucaldılmış abidə önünə əklil qoyacaqlar.

Həmçinin ötən il noyabrın 10-da imzalanmış üçtərəfli Bəyanata uyğun olaraq, Azərbaycan ərazisində müvəqqəti yerləşdirilmiş Rusiya sülhməramlı qüvvələrinin Xankəndi şəhərində təntənəli sıra düzülüşü planlaşdırılır, deyə məlumatda qeyd edilir.

Ermənistan kütləvi informasiya vasitələri sülhməramlıların mayın 9-na qədər faşistlərin əlbiri olan Qaregi Njdenin abidəsinin qaldırılmasını tələb etdiyi haqqında məlumat yaymışdı. Hələlik bu məlumat təsdiqini tapmayıb. Bundan başqa, abidənin yerləşdiyi Martuni şəhərinin erməniləri abidəni sökməyəcəklərini bəyan ediblər. -02В-