Müsavat Partiyası: Ermənistanla münaqişə hələ bitməyib

Bakı/17.11.21/Turan: Noyabrın 16-da Ermənistanın təxribatından sonra başlanan hərbi əməliyyatlar nəticəsində Azərbaycan Silahlı Qüvvələrinin 7 hərbi qulluqçusunun şəhid olması, 10 nəfərin isə yaralanması Azərbaycan-Ermənistan münaqişəsinin hələ bitmədiyini, ölkəmizin ərazi bütövlüyünün təmin olunması üçün hərbi və siyasi-diplomatik sahədə hələ çox işlərin görülməli olduğunu sübut edir. Bu barədə dünən Azərbaycan-Ermənistan sərhədində baş vermiş silahlı toqqusşma ilə bağlı Müsavat Partiyasının bəyanatında deyilir.

Müsavat Partiyası hesab edir ki, Azərbaycan və Ermənistan arasında sərhədlərin demarkasiya və delimitasiyası, eləcə də kommunikasiyaların açılması barədə danışıqlar bilavasitə Bakı və Yerevanla aparılmalıdır.

Əgər vasitəçilərin iştirakı qaçılmaz olacaqsa, bu prosesdə Türkiyənin iştirakı şərt olaraq irəli sürülməlidir.

Partiya həmçinin tələb edir ki, nəzərdə tutulan sazişlər beynəlxalq hüquqa əsaslanmalı, onlar ətrafında danışıqlar isə prosesin şəffaflığının təmin olunması ilə keçirilməlidir.-05D06-