Müsavat Partiyasının mənzil-qərargahından oğurluq faktı üzrə cinayət işi başlanıb

Bakı/22.08.20/Turan:  Müsavat Partiyasının qərargahından oğurluqla bağlı Bakının Binəqədi Rayon Polis İdarəsinin 5-ci polis bölməsində cinayət işi qaldırılıb. Polis bölməsinin əməkdaşları partiya qərargahına gələrək baxış keçiriblər. Bu barədə Müsavat Partiyasının sədri Arif Hacılı  bildirib.

Partiya sədri qərargahdan oğurluq edənlərin tutulub tutulmaması ilə bağlı məlumata malik deyil.

“Avqustun 24-də Müsavat Partiyasının qərargahının məsul əməkdaşları istintaqla bağlı polis bölməsinə dəvət edilib. Yəqin onlara detallı məlumat veriləcək”, -  o qeyd edib.

A. Hacılının sözlərinə görə, oğurluq hadisəsi avqustun 18-dən 19-na keçən gecə baş verib.

“Partiya qərargahının 3 pəncərəsi sındırılıb, iki kondisioner oğurlanıb. Hələlik bunları müəyyən edə bilmişik. Hazırda partiya normal rejimdə fəaliyyətini davam etdirir. Qırılmış pəncərələri təmir etdirmişik”,-   Müsavat Partiyasının sədri bildirib.

Öz növbəsində Binəqədi Rayon Polis İdarəsinin 5-ci polis bölməsindən bildiriblər ki, araşdırma davam edir.—06D-