Dövlət Departamenti: ABŞ İrana qarşı sanksiyaları gücləndirir

Vaşinqton/22.08.20/Turan: ABŞ Dövlət Departamentinin İran üzrə xüsusi nümayəndəsi Brayan Huk cümə günü jurnalistlərə bildirib ki, ABŞ BMT-nin İrana qarşı sanksiyalarını bərpa edir.

“Bu terror rejimi sanksiyaların yumşaldılmasını haqq etmir”, - B.Huk Vaşinqtonda keçirilən telekonfrans zamanı deyib.

Sanksiyaların bərpası o deməkdir ki, silah tədarükünə embarqo bərpa olunacaq. Həmçinin Vaşinqton nüvə və raket proqramları üzərində çalışan iranlıların aktivlərini donduracaq və səfərlərini məhdudlaşdıracaq.

“Ölkənin nüvə və raket proqramlarını maliyyələşdirən İran banklarına qarşı sanksiyalar bərpa olunacaq. Bu, BMT-yə üzv olan ölkələri münaqişə zonasına İran silahlarının buraxılmasına yol verməməyə məcbur edəcək”, - o əlavə edib və qeyd edib ki, sanksiyalar 30 gündən sonra qüvvəyə minəcək.

Diplomat əlavə edib ki, bu addımlar Tehranı Yaxın Şərqdə beynəlxalq terrorizmi dəstəkləməkdən imtinaya məcbur etmək üçün edilir.

Bu sanksiyalar Azərbaycan, Ermənistan və Gürcüstan da daxil olmaqla, İranın qonşularına təsir göstərəcəkmi?

Turan-ın müxbirinin bu sualına Dövlət Departamentinin nümayəndəsi qeyri-müəyyən cavab verərək deyib ki, İran ticarəti genişləndirməyə can atır və öz cinayətkar siyasətini həyata keçirmək üçün iqtisadi nəticələrdən istifadə edir.

Vaşinqton İrana “danışıqlar masası arxasına əyləşməyi və razılığa gəlməyi təklif edib, əks təqdirdə iqtisadi kollapsla qarşılaşacaq”, - B.Huk vurğulayıb.-25B-