Müsavat qanunsuz miqrasiya ilə bağlı ittihamları araşdırmaq üçün komissiya yaradıb (VİDEO)

Bakı/19.11.19/Turan: Müsavat Partiyası mühacir problemi ilə bağlı ona qarşı irəli sürülən bütün ittihamları araşdıracaq. Bu məqsədlə partiya dörd nəfərdən ibarət (Nemət Kərimli, Osman Kazımov, Səxavət Soltanlı - sədr müavini, Fərəc Kərimli) komissiya yaradıb. Bu barədə Müsavat Partiyasının başqanı Arif Hacılı Almaniyada miqrantlara qarşı həyata keçirilən əməliyyat və Müsavat Partiyasına qarşı irəlü sürülən ittihamlarla bağlı noyabrın 19-da keçirdiyi mətbuat konfransında bildirib.

O deyib ki, komissiya Müsavat Partiyasının üzvlərindən kiminsə bu işdə günahlı olduğunu müəyyən edərsə həmin şəıxs cəzalandırılacaq.

“İttihamlar yalandırsa və ya kiminsə əməlində cinayət tərkibi olduğu müəyyən edilərsə, məhkəmələrə müraciət ediləcək. Əgər cinayət tərkibi yoxdursa, mətbuatda təkzib ediləcək”, deyə o qeyd edib.

Hacılı bildirib ki, Müsavat Avropa Koordinasiya Mərkəzi də bu məsələlərlə bağlı komissiya yaradıb. “Həmin komissiya Almaniya polisi ilə əməkdaşlıq etmək və yardımlar göstərmək niyyətindədir”.

Müsavat başqanı Azərbaycan prezidentinin köməkçisi Əli Həsənovun bu partiya ilə bağlı səsləndirdiyi firkilərə də  münasibət bildirib.

“Biz hesab edirk ki, Müssvata qarşı başlayan kampaniyanın başında əvvəldən Azərbaycan iqtidarı və elə Əli Həsənov, ona yaxın qurumlar dayanıb. Eyni zamanda, Azərbaycanın hüquq-mühafizə sistemi və digər hakimiyyət qurumları bu məsələdə daim öz mövqelərini ortaya qoyub”.

Hacılı deyib ki, Almaniyada Azərbaycandan olan miqrantlarla bağlı cinayət işi Rəşad Məmmədov adlı miqrantın şikayəti əsasında başlanıb.

“Maraqlıdır ki, Rəşad Məmmədovun qardaşı da Avropada müxlaifət nümayəndələrinin yaratdığı "Azərbaycan Naminə Demokratiya-AND" təşkilatının xətti ilə Azərbaycandan 500 min adamın Avropaya getdiyini bildirib. Bir qardaşın Müsavatla bağlı olan Müsavat AKM haqqında, digər qardaşın isə  AXCP-yə yaxın AND təşkilatına qarşı iddialar irəıli sürməsi bunun arxasında hakimiyyətin durduğunu düşünməyə əsas verir".

Arif Hacılı Almaniyanın Azərbaycandakı diplomatik nümayəndəliyi ilə görüşmək niyyətində olduğunu deyib.

“Biz səfir və ya konsulla görüşüb, bu məsələləri araşdırmaq və sualları varsa, cavab vermək niyyətindəyik. Məsələlərlə  bağlı əməkdaşlıq edəcəyik. Müsavat Partiyası bu məsələdə zərər çəkən tərəfdir.  Yadınızdadırsa, bir müddət əvvəl Azərbaycanda bir şəbəkə ifşa olunmuşdu, prokurorluğun, Daxili İşlər Nazirliyinin, Müsavat Partiyasının, AXCP-nin saxta möhürləri olan bir ofis ifşa olundu. Məlum oldu ki, mühacir biznesi ilə bağlı bir böyük sənaye açıblar. Eyni şəbəkə, ola bilsin, Avropada aşkarlansın”.

Arif Hacılının sözlərinə görə, başçılıq etdiyi partiya heç bir üzvünün mühacirətə getməsini məsləhət bilməyib.

“Bununla yanaşı, biz adi qaydada onlarla üzvümüzə partiyanın üzvü olması və təzyiqə məruz qalması barədə arayış vermişik. Azərbaycanda nəinki Müsavat Partiyasının, həmçinin real müxalifətdə olan siyasi təşkilatların hər bir üzvü daim təzyiq altındadır”. 

Bununla yanaşı, Müsavat Partiyası artıq iki ildir ki, mühacirətdə olan hər hansı  üzvünə arayış vermir. “Yalnız onların vəkilləri və məhkəmələrin sorğularına cavab veririk”, deyə o qeyd edib.

Almaniyada Azərbaycandan insanların qanunsuz miqrasiyası ilə bağlı cinayət işi başlanılıb. Bir sıra evlərdə, ofislərdə axtarışlar aparılıb, iki nəfər saxlanılıb.

Şpigel jurnalının məlumatında da deyilir ki, alman polisi çoxsaylı obyektlərdə axtarışlar aparıb və Azərbaycan vətəndaşları saxlanılıb.

Müşahidəçilərin fikrincə, Almaniyadakı mütəşəkkil qrup Azərbaycandakı bəzi müxalif siyasi partiyaların və polisin adından saxta sənədlər tərtib edərək pul müqabilində miqrantlara verib.

Bir il əvvəl miqrantlara verilən saxta sənədlərlə bağlı Azərbaycanda da bir sıra partiya funksionerləri Baş Prokurorluğun Ağır Cinayətlərə dair İşlər üzrə İstintaq İdarəsində dindirilib.

Problem bu gün də aktual olaraq qalır və sosial şəbəkələrdə geniş müzakirələrə yol açıb. Hətta Azərbaycan Xarici İşlər Nazirliyi məsələ ilə bağlı açıqlama yayıb.--0--