Müxalifət qüvvələri ADR-in 100 illiyi ilə əlaqədar tədbir keçiriblər

Bakı/28.05.18/Turan: Azərbaycan müxalifət qüvvələrinin geniş spektrinin nümayəndələri mayın 27-də Azərbaycan Xalq Cümhuriyyətinin (AXC - 1918-1920) 100 illiyinə həsr olunmuş tədbir keçiriblər.

Tədbir Müsavat Partiyası tərəfindən Suraxanı Rayon Səttar Bəhlulzadə adına Mədəniyyət Sarayında təşkil olunub.

Partiya başqanı Arif Hacılı 100 il bundan əvvəl islam şərqində ilk dəfə olaraq Azərbaycanda demokratik respublika yaradılmasını böyük gün adlandırıb: "Bu xalqın gücü, xalq ziyalılarının mövqeyi və xalqın iradəsilə baş tutdu", deyə A.Hacılı respublika elan olunmasını dəyərləndirib.

1920-c ildə Rysiyanın işğalı ilə AXC-nin süquta uğradıldığını deyən Müsavat başqanı A.Hacılı 100 ildən sonra ölkənin indiki ağır duruma düşməsinə səbəb kimi ölkədə mövcud hakimiyyəti göstərib.

Hətta A.Hacılı hesab edir ki, Azərbaycanda mövcud rejimin əsas dayağı Rusiya olduğu kimi, ölkənin problemlərinin həll olunmamasının səbəbkarı da məhz Rusiyadır.

Müsavat Partiyası başqanı A.Hacılı deyib ki, hakimiyyət hətta 2018-ci ili ölkədə "Cümhuriyyət ili" elan etsə də, bu tarixə lazımınca hazırlaşmayıb. Ölkədə bayram havası hiss edilmir: "Bu ölkənin nə varlısı, nə kasıbı, nə pullusu, nə pulsuzu, nə hakimiyyəti, nə də sıravi vətəndaşları xoşbəxt deyil, səbəb isə ölkədəki mənəvi iqlimdir".

A.Hacılı son vaxtlar hakimiyyətin Azərbayan Xalq Cəbhəsi Partiyası üzərinə hücuma keçməsini də kəskin tənqid edib, bunu hakimiyyətin ictimai rəylə hesablaşmamasının göstəricisi adlandırıb.

Amma A. Hacılı heç bir reimin xalqdan güclü olmadığını deyərək, mövcud rejimin də sonunun çatacağını vurğulayıb.

Bir müddət idi ki, tibbi müalicə alan Müsavat Partiyasının keşmiş başqanı, Strateji Milli Düşüncə Mərkəzinin rəhbəri İsa Qəmbər tədbirdə iştirak edərək, ölkədəki ictimai-siyasi vəziyyəti təhlil edib: "100 il əvvəl bu xalqın övladları demokratik dövlət qurublar, sovet rejimi 1920-ci ildə bu rejimi süquta uğradıb. 1991-ci ildə Əbülfəz Elçibəyin rəhbərliyi Azərbaycan özünə istinad kimi məhz 1918-ci ildə qurulmuş respublikanı seçib, demokratiya yolunun seçilməsinin təsadüfi olmadığını bildirib". İ.Qəmbər də Rusiyanın Azərbaycan siyasətini kəskin tənqid edib, Azərbaycanın bir çox bəlalarının kökündə Rusiyanın Azərbaycan siyasətinin dayandığını söyləyib: "Başa düşürəm, çoxu deyə bilər ki, 25 ildir ki, bunlar hakimiyyətdədir, bundan irəli gələrək, ruhdan düşə bilərlər, amma buna əsas yoxdur, 25 il tarix üçün heç nədir".

İ.Qəmbər son zamanlar hakimiyyətin AXCP-ni "kirli pul" məsələsində ittiham edərək hücuma keçməsini də qəti şəkildə pisləyib və deyib ki, bir qardaşın göndərdiyi pulun bir hissəsini etimad etdiyi təşkilata verməsində hər hansı qanun pozuntusu yoxdur: "Kimsə öz pulunu kiməsə vermək üçün gəlib Əliyevlər hakimiyyətindən icazə və ya lisenziya almalı deyildi".

İ.Qəmbər bu hücumları hakimiyyətin get-gedə artan gücsüzlüyü kimi qiymətləndirib və bunu başqa cür izah etməyin mümkün olmadığını nəzərə çatdırıb.

Demokratik Qüvvələrin Milli Şurasının sədri Cəmil Həsənli də 100 il əvvəl ölkədə demokratik dövlət qurulmasını xalqın gücü adlandırıb və elə xalqın indiki hakimiyyəti tarixin zibilliyinə atmasına az qaldığını bidirib.

Digər natiqlər də 28 May Respublika Gününü xoş söz və düşüncə ilə qiymətləndirərək, indiki hakimiyyəti ölkədə demokratiya yolunda əsas maneə adlandırıblar.

Natiqlər həmçinin mayın 28-də Novxanı kəndində müxalif qüvvələrin keçirəcəyi tədbirlərlə cümhuriyyət bayramının qeyd olunmasının davam edəcəyini bildiriblər. -06D-