Azərbaycan və Fransa arasında yüksək səviyyədə səfər mübadiləsi

Bakı/27.05.18/Turan: Azərbaycan və Fransa yüksək səviyyədə səfər mübadiləsi həyata keçirir. Bu barədə mayın 27-də Bakıda Azərbaycan və Fransa xarici işlər nazirləri - Elmar Məmmədyarov və Jan-İv Le Drianın danışıqları başa çatdıqdan sonra bildirilib.

2018-ci ilin iyulunda Azərbaycan prezidenti İlham Əliyevin Fransaya səfəri keçiriləcək, deyə Le Drian qeyd edib.

İlin sonunda isə Fransa prezidenti Emanuel Makron Bakıya rəsmi səfərə gələcək.

Fransa naziri bunu Parisin Azərbaycanla münasibətlərə verdiyi böyük əhəmiyyətin göstəricisi adlandırıb.

O, həmçinin Azərbaycan-Fransa iqtisadi münasibətlərinin, o cümlədən nəqliyyat, ekologiya, kənd təsərrüfatı, yüksək texnologiyalar sahəsində münasibətlərin böyük potensialını qeyd edib. Le Drianın sözlərinə görə, ikitərəfli iqtisadi münasibətlərin perspektivlərini müzakirə edəcək xüsusi Azərbaycan-Fransa komissiyasının yaradılması planlaşdırılır.

"Biz Fransa şirkətlərinin iştirakı ilə sənaye parklarında istehsalat müəssisələrinin yaradılmasını müzakirə etdik. Bu gün Azərbaycanda 50-dən çox Fransa şirkəti fəaliyyət göstərir. Bakubus da Fransa şirkətidir", deyə öz növbəsində Məmmədyarov bildirib.

Azərbaycanlı nazir xatırladıb ki, rəsmi Paris Qarabağ münaqişəsinin nizamlanması ilə məşğul olan ATƏT-in Minsk Qrupunun həmsədridir və Bakı bu vasitəçiliyin səmərəli olacağına və münaqişənin sülh yolu ilə həllinə gətirib çıxaracağına ümid edir.

Le Drian da Fransanın Qarabağ münaqişəsinin nizamlanması üzrə səylərini qeyd edərək, hazırki status-kvonun problemin həlli olmadığını və davam edə bilməyəcəyini bildirib.

"Biz regionda sülh və sabitlik istəyirik. Ümid edirik ki, yaxın aylarda problemin sülh yolu ilə həlli üçün Fransanın bu istiqamətdə fəaliyyəti güclənəcək", deyə Fransa XİN başçısı bildirib.

Azərbaycanın Aİ ilə münasibətlərinə toxunan Məmmədyarov Aİ və Azərbaycan arasında sazişin hazırlanması prosesinin davam etdiyini bildirib, bu məsələdə "müəyyən irəliləyişlər olduğunu" qeyd edib. Bakı rəsmi Parisdən bu məsələdə yardım gözləyir.

Fransalı naziri Azərbaycan prezidenti İlham Əliyev də qəbul edib. Tərəflər qeyd ediblər ki, Azərbaycan və Fransa arasında dostluq münasibətləri siyasi, iqtisadi sahədə və digər sahələrdə uğurla inkişaf edir, Fransa şirkətləri Azərbaycanda nəqliyyat, kosmik sənaye, infrastruktur, kənd təsərrüfatı və digər sahələrdə bir sıra layihələri uğurla həyata keçirir.

Həmçinin, energetika sahəsində əməkdaşlıq məsələləri müzakirə olunub. "Cənub Qaz Dəhlizi"nin həyata keçirilməsinin əhəmiyyəti, SOCAR və TOTAL şirkətlərinin uğurlu əməkdaşlığı vurğulanıb.

Le Drian humanitar sahədə əməkdaşlıq məsələsinə toxunaraq, minnətdarlıqla Azərbaycanda Bakı Fransa Liseyinin və Fransa-Azərbaycan Universitetinin açılmasını vurğulayıb. -06B-