![NATO baş katibi Gürcüstanda](https://turan.az/resized/750/500/resize/media/2019/main/032600017733.jpg)
NATO baş katibi Gürcüstanda
Bakı/26.03.19/Turan: NATO-nun baş katibi Yens Stoltenberq Tbilisi yaxınlığındakı Birgə Təlim və Qiymətləndirmə Mərkəzinə (JTEC) baş çəkib və çoxmillətli NATO-Gürcüstan 2019" komanda-qərargah təlimlərinin gedişi ilə tanış olub. Bu barədə Gürcüstan hökumətinin mətbuat xidməti məlumat yayıb.
Alyans üzvü olan 21 ölkədən 350 əsgərin, həmçinin Azərbaycan, Finlandiya, İsveç və Gürcüstandan hərbçilərin qatıldığı təlimlər "Krsanisi" Təlim və Tədris Mərkəzinin ərazisində keçirilir. Təlimlər martın 18-də başlayıb və martın 29-dək davam edəcək.
Təlimlərdə məqsəd NATO və tərəfdar ölkələrin silahlı qüvvələrinin bir arada olmasının təmin edilməsi, həmçinin Gürcüstan müdafiə qüvvələrinin idarəçilik imkanlarının gücləndirilməsidir.
Gürcüstan müdafiə qüvvələri komandanının birinci müavini, polkovnik Nikoloz Cancqava təlimlərin gedişi barədə NATO baş katibinə məlumat verib. Bundan sonra Stoltenberq gürcü hərbçilərlə görüşüb. Onların əksəriyyəti Əfqanıstanda sülhyaratma missiyasında iştirak edib.
"Bilirəm ki, siz öz ölkənizə və bizim alyansa xidmət edirsiniz. Sizin yerinə yetirdiyiniz iş bizim hamımız üçün çox vacibdir, çünki siz terrorizmlə mübarizəyə yardım edirsiniz", - Stoltenberq deyib.
"Əfqanıstanda hələ çox problem qalır, lakin biz bilirik ki, bu gün Əfqanıstan Əl-Qaidə, beynəlxalq terrorçular üçün sığınacaq deyil. Siz olmasaydınız buna nail olmaq mümkün olmazdı. Odur ki, alyans üzvlərinin, tərəfdar ölkələrin, həmçinin bu gün öz ölkəsində əmin-amanlıq içində yaşayan insanların adından sizə xidmətə və alyans üçün etdiklərinizə görə təşəkkür etmək istəyirəm", - Stoltenberq bildirib.
Stoltenberq Şimali Atlantik Alyansının rəhbəri kimi üçüncü dəfədir ki, Gürcüstana gəlir. Bu gün o, Gürcüstan prezidenti Salome Zurabişvili və parlamentin sədri İrakli Kobaxidze ilə geniş formatda görüş keçirib. -02D-
Siyasət
-
Ermənistan ATƏT-in Minsk Qrupunun buraxılmasının əleyhinə deyil, amma indi bu məsələni müzakirə etməyi məqsədəuyğun hesab etmir.
-
Ermənistanın baş naziri Azərbaycan prezidenti İlham Əliyevlə iki ölkənin sərhədində görüşməyə hazırdır. "İlham Əliyevlə görüş Ermənistan-Azərbaycan sərhədində də ola bilər. Mən belə formata hazıram",- Paşinyan bugünkü mətbuat konfransında deyib.
-
Avqustun 31-də Azərbaycanda birpalatalı parlamentə - Milli Məclisə növbədənkənar seçkilər ərəfəsində "sükut günü"dür. Səsvermədən 24 saat əvvəl hər hansı seçkiqabağı təşviqat qadağandır.
-
Avqustun 30-da saat 22:55-ə yaxın Ermənistanın Metsamordakı Atom Elektrik Stansiyası ölkənin enerji sistemindən ayrılıb. Bu barədə Ermənistanın Ərazi İdarəetmə və İnfrastruktur Nazirliyi bildirib. Buna ildırım zərbəsi səbəb olub, nəticədə stansiyanın təhlükəsizlik sistemi stansiyanı təhlükəsiz dayanma rejiminə keçirib. Hazırda stansiyanın kollektivi onun yenidən işə salınması ilə məşğuldur.
Rəy yaz